Kasımın 30-da Moldovada Parlament seçimneri oldu. Seçim listelerindä vardı ilktän 21 politika partiyası hem 4 baamsız kandidat. Ama seçimnerä karşı, cumêrtesi Renato USATIYın “Patriya” partiyasını sud seçimnerdän çıkardıktan sora, kaldı 20 politika partiyası.
Bu çıkarmak ta eni sürprizlär getirer. “Patriya” partiyası içinı ayırmaa isteyennär, bezbelli, kendi oylarını Soţialistlar partiyası için verdilär hem da, nicä kimileri açıkladı, “Patriya” partiyasına verip, seçim bülütennerini bozdular.
Nicä da olsa, Moldovanın Merkez Seçim Komisiyasının şindilik açıklamasına görä parlamenta 5 partiya geçti (sayıldı protokolların 87,6% ) hem ilerdä Soţialistlar partiyası bulunêr:
Soţialistlar partiyası – 21,6% (26 mandat),
Liberal-demokratlar partiyası – 19,29% (23 mandat),
Komunistlär partiyası – 17,76% (21 mandat),
Demokratlar partiyası – 15,76% (19 mandat),
Liberallar partiyası – 9,38% (12 mandat).
