Komrat “Nikolay Tretyakov” teoretik lițeyi cümne kuruluşunda geçti birkaç yortulu sıra, ani ilgiliydilär bu lițeyiin kurulmasının 60-cı yıldönümünnän.
Yoruluu sıraların birisinä katıldılar Gagauziya Başkankası Evgeniya GUȚUL hem Gagauziya üüredicilik Upravleniyanın başı Natalya KRİSTEVA, angıları kutladılar üüredicilik kuruluşunu hem onun zaametçilerini bu gözäl yıldönümünnän.
Gagauziya Başkankası Evgeniya GUȚUL verdi kimi üüredicilerä gramota hem Gagauziya ödüllerini. “Gagauziya şannı vatandaşı” ödülünü kabletti matematikada üürediciyka Tatyana KALÇİŞKOVA. Bundan kaarä Canbisi baaşladı lițeyä bir plazma televizoru da.
Kendi tarafından Komrat “Nikolay Tretyakov” teoretik lițeyin direktoru Polina PINTÄ şükür etti Evgeniya GUȚULa hem Natalya KRİSTEVAya bu saygı, baaşış hem ödüllär için.
Komrat “Nikolay Tretyakov” teoretik lițeyi cümne kuruluşu, Komradın 5-ci şkolası olarak, kuruldu 1964-cü yılın Harman (avgust) ayın 15-dä.
1974-cü yılda şkolaya verildi Sovetlär Birlii Geroyu Nikolay TRETYAKOVun adı.
2004-cü yıldan beeri bu üüredicilik kuruluşu oldu lițey.
Büünkü gündä Komrat “Nikolay Tretyakov” teoretik lițeyi cümne kuruluşunda, iki smenada, 876 üürenci üürener.
