Çiçek ayın 13-dä Komrat regional bibliotekasında oldu bir toplantı, angısı adandı Ay-Boba Mihail ÇAKİRin 155-ci yıldönümünä. Ay-Boba Mihail ÇAKİR – baş aydınnadıcımız. Onun keskin fikiri hem çalışkannıı yardım ettilär çok faydalı işlär gagauzlar için yapmaa. Onun izmetleri gagauz literaturasına yolu açtı.
Çadır kasabasının Ayoz Pantelemon klisesindänn popaz Ay-Boba Dimitri annattı Mihail ÇAKİRin yaşaması için, onun aylesi için hem çalışmaları için.
Zalda bulunan Komrat liţeylerindän hem Mihail ÇAKİR pedagogika kolecındän üürenicilär pek meraklandılar bu annatmalardan. Şaştılar patretlerä, kiyatlara, angılarını vardı kolaylık siiretmää, elinä almaa. O kiyatların arasında vardılar Ay-Boba Dimitriyın bibliotekasından gagauz dilindä pek eski din kiyatları da.
O sergi için meraklı annattı Cadır muzeyin direktoru Stefanida STAMOVA.
Ay-Boba Mihail ÇAKİRin ayozlu çalışmaları için nasaat etti Komrat Mihail ÇAKİRin adına pedagogika kolecin gagauz dilindä üüredicisi Galina KRİSTİOGLU.
Sergidä dä, angısını maasuz bu iş için hazırladılar regional bibliotekada çalışannar, topluydu kiyatlar, jurnallar, gazetalar Ay-Boba Mihail ÇAKİR için, neyä dä açıklamak yapıldı.
Ay- Boba Mihail ÇAKİRin adına pedagogika kolecındän üürencilär İrina YBANCI, Mariya GAYDARCI, Nikolay BASARAB, Üliya KÖR kendi peetlerini okudular.
Galina Dimitrievna KRİSTİOGLU, Komrat Mihail ÇAKİRin adına pedagogika kolecin gagauz dilindä üüredicisi
Foto – Darya MARKOVAnın.
