TİKA Başkan yardımcılıından ayırılan paalı dostumuza Dr. Mahmut ÇEVİKä, TİKAda çalışmaa başladıı zamandan beeri, Gagauziyada çok sayıda türlü proektların yapılmasına omuz koyması hem başarılmaları için candan-ürektän büük zaametleri için bütün gagauz halkından çok şükür ederiz.
İsteerim bütün cümne bilsin, ani Gagauziyada TİKA tarafından yapılan hepsi proektlarda var gagauzların paalı dostunun, TİKA Başkan yardımcısının saygılı Dr. Mahmut ÇEVİKin can sıcaklıı, annayışı hem acık candan büük zaametleri.
Bu proektlar, başlayıp ekonomika, çiftçilik, kultura hem taa saalık, cümne hem üüredicilik uurunda büük proektlara kadar, ölä nicä: Komrat “Aziz SANCAR” alıştırma hem diagnostika korpusu, saalık reabilitațiya merkezleri, “Recep Tayyip ERDOĞAN” üüredicilik kompleksı, Komrat “Hoca Nastradin” uşak başçası, Kıpçak “Recep Tayyip ERDOĞAN” uşak başçası, yaşlılar evleri, sel beterinä evsiz kalannara ev vermäk, su hem sulama proektları, okullarda Tehnoklas inovațiya klasların kurulması, Çadır zanaat uçilişesindä kilimcilik hem terzilik proektları gibi hem ayırıca bu proektlar arasında Kultura evlerimizin remontları hem onnarı büünkü modern oburudovaniyalarlan donadılması, Kişinevda büük aydınımızın Mihail ÇAKİRin byustun koyulması hem bibliotekasının enilenmesi, gagauzça multiklär (çizgi filmnar) yapılamsı, “Ana Sözü” gazetamızın yaşatması proektları…
Paalı dostumuz Dr. Mahmut ÇEVİK, isteerim biläsiniz, ani hepsi bu unudulmaz zaametleriniz bizim cannarımızda yaşayacek. Sizä saalık hem uzun ömür dileriz. Eni çalışmalarınızda yolunuz açık olsun. Hem, nicä gagauzlarda deerlär: “Saalık Allaa versin!”
Saygılarımnan, Todur ZANET
