Canavar ayın (oktäbri) sonunda, taa doorusu 28-dä, Komrat regional resim Galereyasında, kendi işlerini incelemää deyni, Gagauziyanın resimcileri toplandılar. Topladı onnarı Gagauziya resimcilerin “GAGAUZ-ART” Cümne Birlii.
“GAGAUZ-ART” Cümne Birliini 2013-cü yılın Çiçek ayın (aprel) 26-da kurdu kongazlı resimci Sergey KUPAVIH. Onuştan, Canabisi Birliin başı olarak, toplantıda annattı neleri büünkü günädän bu Birlik yaptı hem neleri taa var nicä yapsın.
Protokola görä, sora Cümne Birliin eni başı seçildi – resimci Pötr FAZLI.Toplantıda “GAGAUZ-ART” Cümne Birliini ilerlerdä çalışma planı temelä koyuldu hem ona eni resimcilär aza oldular.
Lääzım urgulamaa, ani bu Birliktän kaarä, Gagauziya resimcilerin taa bir Cümne Birlii var – “Gagauziya Resimcilär Birlii”. Da kimi gagauz resimcileri o Birliin da azaları.
Annadıımız kadar, şindi bu iki Birlik, omuz-omuza koşulup, Gagauziyada resimcilii taa da üüsek uurlara götüreceklär. Bu aydın iştä onnara “Kolay gelsin!” hem “Allaa yardımcı olsun!” deeriz.
