Canavar ayın (oktäbri) 20-dä olan Moldova Prezidentın seçimnerin hem respublika konstituțiyalı referendumun ardına Moldovada saklı sıtma üzä çıktı: gagauzlara karşı națizma kertiindä bulunan ksenofibiya dalgası kalktı.
Taa Prezidentın seçimneri hem respublika konstituțiyalı referendumu bitär-bitmäz, açan belli oldu, ani Prezidentın seçimnerinin II-ci turuna çıktılar Maya SANDU hem gagauz olan Aleksandr STOYANOGLU, Maya SANDUnun komandasında olan Olimpiadada gümüş medalisi kazana serbest güreşçiyka hem Moldova granița kuvetlerindä işleyän Anastasiya NİKİTA hemen İnstagramında yazdı “Teklif ederim, ani hepsi romın pasportlarını ellerindän almaa onnardan, kim bulunêr Evropa Birliindä hem “Yok” oyunu verdilär. Hem Evropadakı moldovannar, ani “Yok” oyunu kullandılar kaldırılsınnar Moldova Respublikasına, durun taa islää Sibirä”.
Bu lafları ortalıı ayaa kaldırdı. Sıradan insannar hem politikacılar buna karşı kalktılar hem Maya SANDUdan bu konuda açıklama istedilär.
İnsan hakları için güreşän Leonid OGARÖV bu Anastasiya NİKİTAnın bu yazısına bölä cuvap etti: “Stalin baskılarında ölän insannarı anmak için, siz vagonnarı kasabanın merkezinä koyêrsınız, sora da kimi sä Sibirä kaldırmaklan mı korkudêrsınız? Siz kendinizä “evropalı” mı deersiniz?”
Bu açıklamalarda sora Anastasiya NİKİTA, Moldova Prezidentı Maya SANDU sölediinä görä, hep taa “Hepsimiz için sän bir örneksin, hem özelliklän Moldovanın gençleri hem uşakları için” kalêr mı? Sanmêêrız.
Ama bu Anastasiya NİKİTAnın lafları sade çiçecikmiş. Aradına taa büük tikennär geldi.
Moldova Prezidentın seçimnerinin II-ci turuna çıkan Aleksandr STOYANOGLU gagauz olduu için, Maya SANDUyu kandidat çıkaran “Çalışmak hem Birlik” (PAS) politika partiyasının azaları hem taraftarları Marian ANDONİ hem Radu DUTKOVİÇ açıktan başladar gagauzlara karşı națizma kertiindä bulunan ksenofibiyayı. Onnar, internetä cannı yayına çıkıp, gagauzlar için yalannar hem gagauzların üstünä türlü mındarlıklar atmaa başladılar.
Bu eriflerin națizma kertiindä bulunan ksenofobiyalan mındarlıklarını esaba alarak, polițiyaya danıştılar politikacılar hem Moldovanın Baş prokuroruna açıktan yazıylan danıştı Moldova Prezidentliinä kandidat olan İon KİKU https://drive.google.com/file/d/1IHX-Gjwew0L3ydUYPz1YDoHHvvzxJcEr/view. Bundan kaarä prokuraturaya haber etti Moldovanın “Fermerların kuvedi” Asoțiațiyası da.
Moldova Prezidentı Maya SANDU da kendi Facebook sayfasında milletlää görä saldırı ayırımcılıı daavaladı hem teklif etti “Hadiyin insannarı bölmeyelim milletlää görä hem ölä nicä oy verdilär”.
Not. Polițiya açıkladı, ani națizma kertiindä bulunan ksenofoblara 4 000 ley ceza koyula bilir, ama … sade sudun kararınnan.
