Moldovada peydalandı Ukraynanın «Миротворец» saytının ikizi – “Mirotvorets”. Bunu cümneyä ilkin kendi Facebook sayfasında açıkladı Moldovanın eski vițe-premyer-ministrusu Aleksandr MURAVSKİY.
Moldovanın bu saytın başında yazılı: “Mirotvorets.info – reprezintă o bază de date cu persoane care au săvîrșıt/săvîrșesc acțiuni contra intereselor națıonale ale Republıcıı Moldova” (“Mirotvorets.info – Moldova Respublikasının milli intereslerinä karşı gidän/yapan kişilerin er aldıı bir bilgi bazası”).
Kim kurmuş bu saytı belli diil. Bir iş şaşırdêr: romun dilindä “Mirotvorets” lafı yok. Onun karşılıı romıncada – “Pacificator”. Ozaman sayatın adı nedän “Mirotvorets” da diil “Pacificator”?
Bakmadaan ona, ani saytı kurannar açıkladılar, ani bu sayta koyulêrlar kriminal avtoritetları, politikacılar hem cümne aktivistleri, angıların Rusiya Federațiyasınnan baalntılarında şüpä var hem dä onnara “kreminal avtoritetı”, “Kremli agentları”, “rus maasuz slujbaların etkiliyici agentları” gibi damgalar urulêr, bu uurda cümnedä başka düşüncülär da var. Örnek olarak, Moldovanın eski vițe-premyer-ministrusu Aleksandr MURAVSKİY kendi Facebook sayfasında açıkladı, ani o sayêr ki, “bu saytta artık yayınnanêr dosyelar politikacılara hem aktivistlara, kimin bakışları uymêêrlar kuvettä bulunan “Çalışmak hem Birlik” partiyasının pozițiyasına.
Moldova pravitelstvosunun premyer-ministrusu Dorin REÇAN artık selemnadı bu saytın peydalanmasını, pres-sekretari Daniel VODA sa açıkladı, ani “pravitelstvo bu saytı kurmadı hem onun peydalanmasınnan pravitelstvonun ilgisi yok”.
“Mirotvorets.info” saytı açıldıı gibi, Moldova Parlamentın “Enseyiş” grupasının deputatı Marina TAUBER danıştı hakları koruyan organnarına, baksınnar ukraynalı «Миротворец» saytın moldovalı analogunun ekstremizma belirtileri dolayı durumunu.
Şindilik bu sayta 25 kişinin patretleri hem, sayta görä, ne oldukaları hem buraya erleştirilmä sebepin yazısınnan patretleri koyulu. Herbir patredin üstündä da “persana non grata” damgası var.
Te o kişilerin kimileri: Moldovanın gagauz olan eski Baş prokuroru hem prezidentlää kandidat Aleksandr STOYANOGLU, Gagauziyadan Moldova Parlamentın deputatı Aleksandr SUHODOLSKİY, Gagauziya Başkankası Evgeniya GUȚUL, Gagauziya İspolkomu predsedatelin birinci yardımcısı Viktor PETROV, Gagauziya Başkankasının danışmanı Mihail VLAH, Gagauziyanın eski Başkankası hem prezidentlää kandidat İrina VLAH, Moldovanın eski prezidentı hem Soțialistlär partiyasının başı İgor DODON, Moldova Parlamentın deputatı Marina TAUBER, kaçak oligarh İlan ŞOR, kaçak biznesmen Veçeslav PLATON, jurnalist Dimitriy BUYMİSTRU, jurnalist Dimitriy ÇUBAŞENKO, jurnalistka hem prezidentlää kandidat Nataliya MORAR.
