2018-ci yılın Canavar ayın 18-dä Türkiye Prezidentı Sayın Recep Tayyip ERDOĞAN Gagauziyaya pek önemni hem faydalı bir vizit yaptı. Vizit sürprizdän başladı – Türkiye Prezidentı Komrata göklerdän vertolötlan indi, konup Komrat stadionuna. Canabisinnän bilä Gagauziyaya geldi Moldova Prezidentı İgor DODON da. Stadionun halını görüncä, Recep Tayyip ERDOĞAN hemen söledi, ani bu stadionu Türkiye eniledecek.
Gagauziyayanın İspolkomunun hem Halk Topluşun binasının önündä paalı Türkiye Prezidentını Sayın Recep Tayyip ERDOĞANı hem onun eşini Emine ERDOĞANı Gagauziya tuz-ekmeklän hem çiçeklän karşladı.
Nedän sora Recep Tayyip ERDOĞAN İspolkomun hem Halk Topluşun toplantı salonunda buluştu Gagauziya Başkanı İrina VLAHlan hem Gagauziya Halk Topluşun Başınnan Vladimir KISSAylan. Bu buluşmada pay aldı Moldova Prezidentı İgor DODON da.
İspolkomun hayatında Türkiye Prezidentı saygıylan durgundu “Gagauziya (Gagauz Yeri) hakk statusu” Zakonu için ellerini kaldıran Moldova Parlamentın deputatların laablarınnan tablonun yanında.
Hep burada TİKA Başkanı Serdar ÇAM tanıştırdı Türkiye Prezidentını hem delegațiyayı Gagauziyada yapılacek “Recep Tayyip ERDOĞAN üüredicilik kompleksı”n maketınnan. Serdar ÇAM urguladı, ani “kompleksın proekt işleri tamamnandı. Bu üüredicilik kompleksı çok yıllar gençlerä izmet verecek hem gençlerin modern hem en islää çerçevedä üürenmesinä deyni keezi var. Burada olacek 500 üürenciyä 1 üüredicilik binası, 2 obşçejitiye, 452 siirediciyä deyni 1 kapalı sport salonu, 1 futbol, 1 voleybol, 2 basketbol, 1 tenis meydanı olarak 5 açık sport ploşçadkaları, 270 kişilik konferențiya salonu hem 352 kişilik kantina”.
Recep Tayyip ERDOĞAN, İgor DODON hem İrina VLAH ortak preskonferențiyada açıklamalar yaptılar. Kendi açıklamasında Türkiye Prezidentını dedi, ani “TİKA başta olarak, primariyalarımız, ofițial kuruluşlarımız hem țivil toplum kuruluşlarımız Moldovada pek çok proektlara imza atêr. Biz proektları dostluumuzun, ortak geçmişimizin, barabar geleceemizin birär simvolları olarak görüyoruz”. İrina VLAH sa, TİKAnın bölgedä eni bolnița hem uşak başçasını yaptıını; su, altyapı hem enileme proektlarını gerçekleştirdiini syleyeräk “TİKAnın yardımnarınnan bölgemiz kalkınacak” dedi.
Sora hepsicii yollandılar Türkiye Ankara Altındaa primariyamısının tarafından enilenmiş Komrat Kultura Evin açılısına.
