Şveyţariya hem Moldova pravitelstvoların arasında imzalanan insannık yardımı hem teknik işbirlii annaşmasına görä Gagauziyanın 5 liţeyindä “Ecosan” kuru tualetlerı yapılacek. Orak ayın 23-dä Gagauziyada Şveyţariyanın “Scat” Fondun filialınnan konuylan ilgili dört taraflı annaşma imzalandı.
Gagauziya ofiţial saytı bildirdi, ani ayırılan liţeylär bunnar: Baurçu, Başküüyü (Kirsovo “M.Tuzlov”), Çöşmäküüyü, Kıpçak “S.Baranovskiy” hem Kongaz liţeyleri.
Gagauziya tarafından annaşmayı imzaladılar: üüredicilik Upravleniyasının başı Vera BALOVA, küülerin primarları P. POPAZ (Baurçu), S.SAPUNCI (Kirsovo), G. BOEV (Çöşmäküüyü), V. KOLİOGLU (Kıpçak), K. TELPİZ (Kongaz) hem da liţeylerin direktorları G. PAMUCAK (Baurçu), G. VORNİKOGLU (Kirsovo “M.Tuzlov”), E. RİŞİLÄN (Çöşmäküüyü), İ. TOLMAÇ (Kıpçak “S.Baranovskiy”), İ. YASIBAŞ (Kongaz).
Şveyţariyanın “Scat” Fondun adından annaşmayı imzaladı Moldovada su vermäk hem kanalizaţiya proektın zaametçisi Conatan HEKKE.
Nicä açıklandıydı taa ilerdän, herbir liţeydä ayak yolların yapılması için 800 bin ley harcanacek. Onnardan 600 binär ley Şveyţariya tarafı verer, 200 binär ley da herbir liţey bulsun lääzım.
Proekt önümüzdeki yılın sonuna kadar başarılacek.
