Gagauziya Radio hem Televideniyeylan (GRT) cümne Kompaniyasının hem Türkiyenin Radio hem Televideniye (TRT) kuruluşun arasaında dostluk hem işbirlii baalantıları uzun zamandan beeri kuruldu. Çok yıllar sıravardı, Türk İşbirlii hem Koordinațiya Agenstvosu (TİKA) zaametinnän, bu baalantılar ilerledi.
Geçennerdä Türkiyenin Radio hem Televideniye (TRT) kuruluşundan zaametçilär Gagauziyaya geldi da Gagauziya Radio hem Televideniye (GRT) cümne Kompaniyasının jurnalistelerinä hem işçilerinä 5 günün içindä kurslar verdilär hem tele- radio- jurnalistikaylan operatorluk ustalıında treninglar yaptılar. Bundan kaarä TRT zaametçileri getirdilär hem baaşladılar GRTya en üüsek kalitedä dicital kameraları.
Trening zamanı vakıdında TRT temcilciler buluştular Gagauziya Başkankası İrina VLAHlan, neredä annattılar GRT cümne Kompaniyasında kendi çalışmaları için. Buluşmada Türkiye Gagauziya Komrat Başkonsulu Hasan AKDOĞAN da vardı.
Bundan kaarä tanışma oldu Komrat Devlet universitetınnan hem “Ana Sözü” gazetasının çalışmasınnan. TRTnın baş menegerı Gonca ERBAKAN, “Ana Sözü” gazetasının baş redaktorunnan Todur ZANETlän buluşarak, TRT adından baaşladı ona bir dicital diktofon.
