Çiçek ayın (aprel) 24-dä, Türkiye-Moldova arasında “Parasız yardım annaşması” çerçevesinä görä, Türkiyedän Moldovanın saalıı, işi hem cümneyi koruma ministerliinä, verildi medițina ekipirovkası yardımı. O yardımı Çiçek ayın (aprel) 23-dä Kişinev aeroportuna getirdi Türkiye Hava Yolları (THY) eroplanı, angısı geldi evä almaa Türkiye vatandaşların 100 kişisini.
Türkiye hem Moldova arasında “Parasız yardım annaşması” yapıldı 2020-ci yılın Çiçek ayın (aprel) 17-dä. Onun çerçevesindä, Moldovanın saalıı, işi hem cümneyi koruma ministerliinä gelän medițina ekipirovkası yardımında var: 30.000 taanä No: 95 maska, 10.000 taanä koruyucu tulum (kombinizon), 5.000 taanä koruyucu gözlük, 10.000 çift eldiven, 10.000 taanä kaloş hem1 ton el dezenfektantı. Bu malların tamojnedän hızlı geçmesinä yardımcı oldu Moldovanın saalıı, işi hem cümneyi koruma ministerliin zaametşileri.
Çiçek ayın (aprel) 24-dä, Türkiye Respublikası Kişinev Büükelçisi Gürol SÖKMENSÜER, presa temsilcileri önündä, bütün bu yardımı Moldovanın saalıı, işi hem cümneyi koruma ministrusuna Viorika DUMBRAVÄNUya, ofițial olarak, verdi.
Yardımı kablederäk Moldova saalık ministrusu Viorika DUMBRAVÄNU kendisindän hem bütün Moldova halkın adından şükür etti Türkiye Respublikasına vakıdında gelän bu lääzımnı mallar için. Canabisi söledi, ani “bu yardım, nicä dä herkerä, gösterer Türkiyenin, Moldovaya yardım elini uzadarak, dayanışma ruhunu”.
Ministru Viorika DUMBRAVÄNU urguladı, ani “Türkiyedän gelän medițina ekipirovkası Moldovanın saalık sistemasına deyni onemni hem pek lääzımnı”. Canabisi dedi, ani “bu yardım Moldovadakı hepsi bolnițalara payedilecek hem, koronavirus salgınınnan düüşän medițina personalın saalıını korumakta zorlukları kapadacek”.
Yardımın verilmesinin ofițial sırasında Türkiye Respublikası Kişinev Büükelçisi Gürol SÖKMENSÜER da kendi nasaatında söledi, ani “Türkiye hem Moldova arasındakı dostluk ilişkilerä hem kurulduu strategiyalı ortaklaa urgu yaparak, Türkiye ileri dooru da, kuvedä görä olan ölçüsündä, dost Moldova halkın yanında olacek”.
Öbür taraftan, Moldova Prezidentı İgor DODON da soțial mediya meydanında açıkladı, ki Çiçek ayın (aprel) 6-da Türkiye Prezidentı Recep Tayyip ERDOĞANnan telefonda lafetmiş hem şükür etmiş Canabisinä, bir karşılıksız insannık yardımı olarak, medițina mallarını önemni ölçüdä yollaması için, bakmayarak ona, ani Türkiyenin kendisi da koronavirus salgınınnan düüşer da Moldovaya, nicä da başka bütün devletlerä, yardım eder.
