Canavar ayın (oktäbri) 15-dä Moldovada Türkiye Büükelçisi Mehmet Selim KARTAL hem TİKA koordinatoru Canan ALPASLAN Kauşan rayonunun Baurçu küüyünä vizit yaptılar. Küüdä vizit programasına katıldılar Moldova respublikasının gagauzlar cümne kuruluşun predsedateli Nikolay TERZİ, “Ana Sözü” baş redaktoru Todur ZANET, Moldova cümne televideniyasının gagauz programasının redaktoru Mariya KORNİENKO.
Baurçu küüyündä paalı musaafirleri tuz-ekmeklän karşladılar küüyün primarı Natalya KARAPİRÄ, gagauz dilindä üüredici Nina PAMUCAK, uşaklar hem küülülär.
Türkiye Büükelçisi Mehmet Selim KARTAL hem TİKA koordinatoru Canan ALPASLAN, hem da onnarlan bilä gelän musaafirlär ilkin küüyün bibliotekasınnan tanıştılar. O günü Baurçu küüyün bibliotekasına büük baaşışlar verildi: Moldova respublikasının gagauzlar cümne kuruluşun predsedateli Nikolay TERZİ baaşladı o kiyatları, angılarının çıkmasında kendisi sponsorluk yapmış. Yazıcı hem poet Todur ZANET ta baaşladı kendi kiyatlarını, “Ana Sözü” gazetalarını hem “Kırlangaç” jurnalını.
Bibliotekadan sora Büükelçi Mehmet Selim KARTAL hem TİKA koordinatoru Canan ALPASLAN küüyün muzeyinnän tanıştılar. Burada muzeyin öndercisi Nina PAMUCAK annattı küüyün istoriyasını hem muzeyin kurulması için, tanıştırdı o eksponatlarlan, ani küülülär muzeyä baaşlamışlar.
Muzeydän sora Baurçu küüyün musaafirleri tanıştılar küüyün uşak başçasınnan.
Vizit programasının büük bir payını aldı Baurçu küüyün içmä su proektınnan tanışmak. Bütün delegaţiya küüyün kenarına yollandı. Burada küüyün primarı tanıştırdı hepsini eski skvajinanın erinnän hem annattı, ani bu skvajina artık küüyä eterli su verämeer. Sora da, proektta olan eni skvajina erinä gidildi. Burada Natalya KARAPİRÄ detalli annattı Mehmet Selim KARTALa hem Canan ALPASLANa eni su içmä proektı için. Urgulayıp onu, ani içmä su 420 metra derinniktä bulunêr, da bu üzerä skvajinanın paası pek üüseler, çünkü skvajina işlesin deyni burayı lääzım olacek eni elektrika kabelini çekmää hem küüdä su borularını yapmaa. Sonunda primar açıkladı, ani küülülär da bu proekta katkıda bulunmaa hazır. Büükelçi Mehmet Selim KARTAL hem TİKA koordinatoru Canan ALPASLAN su proektınnan ilgili detalli konulara girdilär hem soruşlarına cuvap aldılar.
Kırdan delegaţiya küüyün kultura evinä döndü. Burada onnarı artık küülülär beklärdilär. Paalı musaafirlerä deyni gözäl bir konţert gösterildi. Konţerttä hem gagauz hem da moldovan oyunnarı gösterildi. Konţerttän sora da Büükelçi Mehmet Selim KARTAL şükür etti baurçululara bu gözäl gün için hem söledi, ani Baurçu küüyün bütün problemaları incelenecek.
Not. Kauşan rayonun Baurçu küüyü 1921-ci yılda kurulmuş, açan burayı Gagauziyanın Çadır rayonundan Baurçu küüyündän ilk aylelär gelmişlär. Büünkü gündä bu küüdä 556 insan yaşêêr.
