Harman ayın (avgust) 9-da Türkiye Respublikasının Prezidentı Recep Tayyip ERDOĞAN hem Rusiyanın Prezidentı Vladimir PUTİN Sankt-Peterburg kasabasında buluştular.
Buluşmadan sora yapılan pres-konferenţiyada Türkiye Respublikasının Prezidentı Recep Tayyip ERDOĞAN açıkladı, ani iki taraf ta taa üüsek neetlän hazır iki devlet arasında işbirliini ilerletmää hem enidän kurmaa. “Bu iş pek uyêr iki memleketin cümnesinin isteyişlerinä. Büünkü buluşmalarda biz aldık lääzımnı kararları Türkiye-Rusiya arasında politika, ekonomika hem kultura uurunda ilişkileri enidän kurmaa deyni”, bildirer Türkiyenin Anadolu agenstvosu.
Türkiye prezidentı urguladı, ani iki taraf ta ortak hem plannı çalışmak adımnarını yapacek o uurda, ani enidän kurmaa deyni Üüsek uurda işbirlii Sovetinin toplantılarını, çarter uçak ilişkilerini, alış-veriştä kısıtlamaları yok etmää, onnarın arasında çiftçiliktä dä, işadamnarın çalışmalarında kolaylık atmosferayı kurmaa, hem da viza rejimini incelemää.
Recep Tayyip ERDOĞAN urguladı, ani Rusiya hem Türkiye arasında alış-veriş 35 miliard dolara etiştiydi hem neettä vardı onu 100 miliard dolara kaldırmaa. Şindi sa, bitki olaylardan sora, bu ţifra 27-28 miliarda düştüydü. “Herliim tutarsanız aklınızda, bizim uurumuz 100 miliard dolardı. Bizdä var kuvet hem neet bu uura etişmää. Büün biz genä başlêêrız bu proţesı da hep ölä kuvetlän ilerledecez onu”.
Tükiyenin Prezidentı hepsinin önündä tekrar urguladı onu, ani asker devlet devrimi denemesindän sora, ertesi günü Rusiyanın Prezidentı Vladimir PUTİN ona telefon açmış. “Bu bizä halizdän lääzımnı işti psihologiya durumundan. Bu Rusiya hem Türkiye dostluk bakışından moral yardımıydı”.
“İki taraf ta hazır, ani iki devlet arasında ilişkileri krizis öncesinä hem da taa üüsää kaldırmaa”,- urguladı Recep Tayyip ERDOĞAN.
