1614-cü yılda Osmannı İmperatorluu hem Polşa (ozamannar Polşa-Litva) arasında diplomatiya ilişkileri kuruldu. Bu üzerä 2014-cü yıl bu yıldönümünün kutlamaları çerçevesindä geçer.
Bu kutlamalarlan ilgili olarak, Çiçek ayın 15-dä Moldovanın “Sergey Lunkeviç” adına Milli Filarmoniyasında bir simvoniya konţertı yapıldı. Konţert Moldovada Türkiye hem Polşa Büükelçiliklerin ortak çalışmalarınnan hem Moldovanın Muzıka, teatr hem incäzanaat Akademiyasının katkısınnan hazırlandı.
Konţertın açılış nasaatlarını yaptılar Moldovada Türkiye Büükelçisi Mehmet Selim KARTAL hem Moldovada Polşa Büükelçiliin temsilcisi (Polşa Büükelçisi Moldova prezidentın Polşaya ofiţial viziti sebepinnän orada bulunêr).
İkibuçuk saatlık konţertta pay aldılar Moldovanın Muzıka, teatr hem incäzanaat Akademiyasının simfoniya orkestrası, Polşadan difijor Pavel KOTLA, Türkiyedän solistka hem pionistka Ezgi SERİM hem kemençeciyka Olga BOİCO.
Filarmoniyaya gelän siiredisilär işittilär türk halk türkülerini hem Türkiye kompozitorun Cemal Reşit REYin süitasını, Polşa kompozitorların F. CHOPİNın, Wojciech KİLARın, Henryk WİENİAWSKİyin hem Mieczyslaw WEİNBERGın yaratmalarını, Moldova kompozitorun Genadiy CİOBANUnun “D. Cantemir” için yaratmasını.
Belli ki nesoy simfoniya konţertı var nicä olsun herliim orada büük kompozitorun Ludwig van BEETHOVENın musıkası ötmäzsa. Konţertın ikinci payında, dirijor Pavel KOTLA ondeciliinnän, simfoniya orkestrası siiredicilerä deyni bu kompozitorun 5-ci simfoniyasını çaldı.
Konţert bittiynän Büükelçi Mehmet Selim KARTAL Türkiyedän solistkaya Ezgi SERİMä, dirijöra Pavel KOTLAya hem kemençeciykaya Olga BOİCOya çiçek baaşladı.
Konţerttan sora Moldovada Türkiye hem Polşa Büükelçilikleri bir reçepţiya verdilär.
