Canavar ayın (oktäbri) 29-da, 1923-cü yılda Mustafa Kemal ATATÜRK kurduu Türkiye Respublikasının 91-ci yıldönümününü kutlandı. Bu yortuylan ilgili olarak Moldova Türkiye Büükelçisi sayın Mehmet Selim KARTAL, eşinän Banu Cankan KARTAL hanum-efendiylän birliktä “Leogrand Hotel”indä bir reçepţiya verdilär.
Reçepţiyada pay aldılar Moldova prezidentın eşi Margarita TİMOFTİ, Moldovada bulunan diplomat hem Halklararası misiyaların temsilcileri, deputatlar, Gagauziyanın öndercileri, türk hem moldovan işadamnarı, politika hem kultura insannarı.
Reçepţiyanın ofiţial açılışı pek gözäl oldu. Maasuz Türkiye Respublikasının yortusu için Moldovaya gelän “Three Anatolian Sopranos” türk artistleri sţenadan ilktän Türkiyenin sora da Moldovanın Gimnasını çaldılar. Gimnalar çalınarkana zala sıravardı iki devletin dalgalanan Bayrakları getirildi.
Sora Büükelçi Mehmet Selim KARTAL, sţenadan musaafirlerä kısa bir sözlän danışıp, okudu Kendisinin adına yollanan Türkiye Respublikası Prezidentının sayın Recep Tayyıp ERDOĞANın kutlama mesajını. Bundan sora da Türkiye Büükelçisi okudu Moldova Prezidentının Nikolae TİMOFTİnin Türkiye Respublikası Prezidentının sayın Recep Tayyıp ERDOĞANın adına Türkiye Respublikasının yortusunnan ilgili kutlama mesajını.
Sözünü başardıktan sora, Mehmet Selim KARTAL teklif etti sţenaya buyursunnar Moldova prezidentın eşi Margarita TİMOFTİ hem Banu Cankan KARTAL da, üçü birliktä, Türkiye Respublikasının 91-ci yıldönümü hem Türkiye-Moldova dostluu için birär fujer şampanskiy kaldırdılar.
Reçepţiyanın ofiţial bölümündän sora musaafirlerä deyni Türkiyeyi tanıdan bir film gösterildi. Nedän sora da “Three Anatolian Sopranos” grupanın solistleri bir konţert gösterdilär.
PATRETLERDÄ: (soldan) Banu Cankan KARTAL, Margarita TİMOFTİ, Mehmet Selim KARTAL.
Foto – Eucen HARABARA
