Kırım ayın (dekabri) 7-dä TÜRKSOY binasında 2015 yılında Türk Dünäsında yılın literatura adamı seçilän Kirgiz Şiir Akademiyası Başkanın hem halk poetın Omor SULTANOVun 80 yaş kutlama toplantısı yapıldı. Toplantıyı ortak hazırladılar Avrasya Yazarlar Birlii (AYB), TÜRKSOY hem Kirgiz Respublikasının Ankara Büükelçilii.
Yubilärın kutlaması başladı Canabisini tanıtmak bir filmnan. Sora, kutlamak sözü tutmak hem yubilära baaşışları vermäk için, tribunaya sıravardı çıktılar TÜRKSOY genel sekreteri Düsen KASEİNOV, Kirgiz Respublikasının Ankara Büükelçisi Ibragim JANUSOV, Avrasya Yazarlar Birlii başkanı Yakup ÖMEROĞLU, 2014 yılında Türk Dünäsında yılın literatura adamı seçilän KKTC yazıcısı İsmail BOZKURT hem başkaları.
Gagauz poetı Todur ZANET kutlama sözündän sora, Avrasya Yazarlar Birlii başkanı Yakup ÖMEROĞLUylan birliktä, baaşladı yubilära gagauz resimcisinin Sergey SAVASTİNın “Düş” adlı yaalı boya resimini.
Sonunda söz tuttu kendisi Omor SULTANOV. Canabisi şükür etti hepsinä kim bu yıldönümünü hazırladı hem hepsi insannara, ani kendisini kutlamaa deyni bu salona geldilär. Omor SULTANOV açıkladı, ani büün da durmamayca sevda peetleri yazêr, çünkü “bunun sebepi, 80 yaşında sevdanın halı nasıl olduunu sizlerä da üüretmeyä istemämdir.” Bu sözlerini temelleştirmää deyni Canabisi okudu sevda için eni bir peetini hem, nicä düşer kirgiz aksakalına, baaşladı musaafirlerinä kendi baaşışlarını da.
Omor SULTANOVun 80 yaş kutlamaları başarıldı kısa bir konţertlän, angısında Maestronun peetlerinä türküleri çaldı anılmış kirgiz türkücüsü hem kompozitoru Abidin TEMİROV. Konţertin en gözäl nomeri da “Ak bulut” türküsü oldu.
Kutlamalardan sora Omor SULTANOV imzaladı kendi kiyatlarını, ani 2015-ci yılda Türkiyedä tiparlandılar.
