Ukrayna Parlamentı aldı karar kış vakıdından yaz vakıdına saatları diiştirmektän inkär olmaa. Bu devlettä güzä, Cnavar ayın (oktäbri) 27-nä, bitki kerä saatları kış vakıdına geçireciklär da birtaan artık bunu yapmayaceklar.
Ötää Ukraynada Kiev vakıdı kurulêr – halklararsı uuruna görä UTC+2 olêr.
Bu kararı alarkana açıklandı, ani saatların diiştirelmesindän sade zarar var – hem ekonomika uurunda hem da insannarın saalıı uurunda.
Bu zararları ortadan kaldırmaa hem işi doorutmaa deyni Rada (Ukraynanın Parlamentı) aldı karar kış vakıdından yaz vakıdına saatları diiştirmektän bu yıldan beeri artık inkär olmaa.
2020-ci yılda Baba Marta ayın 26-da Evropa Parlamentın deputatları 410 oylan (192 – karşı, 51 – ikiliktä) karar aldıydılar, ani Evropa Birliinä girän devletlerdä yaz hem kış vakıdına geçmektän vazgeçmää. Ama sora, kendi kararına tükürüp, bunu yapmadılar. Ozaman Moldova Respublikasının öndercileri dä, Evropa Birliinä girmää savaştıkları için, hep bölä bir karar alaceydılar, ama almadılar.
Şindi bakalım Moldova Ukrayna ardına saat diiştirmesi uurunda gidecek mi?
