Artık iki gün nicä Vengriyanın Milli Topluşun Predsedateli László KÖVÉR ofiţial bir vizitlan Moldovada bulunêr. Ceviz ayın (sentäbri) 22-dä Canabisi Gagauziyaya geldi.
Komrada vizit çerçevesindä László KÖVÉR buluştu Gagauziya Başkanınnan, Gagauziya Halk Topluşu Başınnan, Komrat Devlet Universitetın rektorunnan hem Komrat primarınnan.
Buluşmalarda pay aldılar GHT deputatları hem İspolkom azaları.
Vengriyanın Milli Topluşun Predsedateli László KÖVÉR buluşmalarda urguladı, ani Vengriya her zaman yardımcı olacek Moldovanın Evropa Birliinä girmesi için.
Gagauziya Başkanı İrina VLAH buyur etti László KÖVÉRa pay alsın Gagauziyada Kasımda olacek İnvestiţiya forumunda.
Gagauziya Halk Topluşu Başı Dimitriy KONSTANTİNOV buluşmada aalaştı üüsek musaafirä, ani Moldova Gagauziyaylan ilgili çok zakonnarı esaba almêêr, ama, urguladı GHT Başı, “biz soruşları diplomatiya yolunnan çözmää savaşêrız”.
Komrat Devlet Universitetında László KÖVÉR tanıştı nicä işleer vengr dilini üürenmäk odası. Canabisi açıkladı, ani Vengriyada kuruldu bir devlet programası, angısına görä Moldovadan 30 student var nicä Vengriyanın universitetlarında üürensinnär.
Buluşmalarda László KÖVÉR teklif etti Gagauziya öndercileri bir iş vizitınnan Vengriyaya gelsinnär.
Komrata László KÖVÉRın vizitında onun yanında vardılar Vengriya Kişinev büükelçisi Matyas SZILAGYI, Moldova ministruları hem Moldova Parlamentın deputatları.
