Parijda olan XXXIII-cü Yaz Olimpiada oyunnarı artık geçmişä vardı. Harman ayın 11-dä onnarın ofițial kapanışı oldu da Moldova için esap bunu gösterdi – Moldovada 4 medali (1 – gümüş hem 3 bronza) hem bir da protest apeläțiyası.
Moldova tarafından Yaz Olimpiada oyunnarında birdän 4 medali kazanmaa – bu büük bir başarı. Beşincisi da olaceydı, ama Olimpiadakı sudyalık pek yufka olduu için o medaliyi, şindilik, kaybettik.
Medalilär için söleyeräk, açıklayalım o medalileri kazanan kahramannarın adlarını. Gümüş medaliyi karılar arasında serbest güreştä 57 kg kategoriyasında aldı Anastasiya NİKİTA. Bronza medalilerini kazandılar dzüdocular Denis VİERU (66 kg kategoriyası) hem Adil OSMANOV (73 kg kategoriyası), hem da kanoecı Sergey TARNAVSKİY (tek-kanoe kürek çekmesi, 1000 m).
Bakarak Moldovanın Olimpiadalarda kazanan medalilerinä göreriz, ani, 1996-cı yıldan bu günädän, sekiz Yaz Olimpiada oyunnarında Moldova 10 medali kazandı (3 – gümüş, 7 – bronza).
Moldovada 11-ci medali da olaceydı, ama XXXIII-cü Yaz Olimpiada oyunnarında aar atletın Marian ROBUnun yolunu kesmää deyni, genä yufka sudyalık tarafından “yannışlıklan”, 3-cü eri verdilär italiyalı aar atleta, angısının denemeleri arbitralar tarafından kabledilmedi. Bu uurda Moldova aar atletika Federațiyası, apeläțiya yapıp, protest etmesini açıkladı.
