Ceviz ayın (sentäberi) 15-dä Gagauziya Başkanı İrina VLAH kısa hem hızlı bir vizitlan Bukureştä bulundu.
Romıniyanın dışişleri ministerliin saytı bildirdi, ani o Ceviz ayın (sentäbri) 15-dä saat 15:00 Canabisinnän buluştu Romıniya dışişleri ministrusu Bogdan AURESCU.
Buluşmadan sora yapılan açıklamada sölendi, ani orada Romıniya hem Gagauziya avtonomiyası arasında işberliin gelecää incelendi. Urgulandı, ani Romıniya verer 450 bin Euro Gagauziyada pestiţidları yok etmää deyni. Açıklandı, ani Romıniya hazır yardım etmää Moldovanın herbir vatandaşına, bakmadaan onun milletliinä.
Buluşmadan taa derin bir açıklama ne Romıniya ne da Gagauziya tarafı yapmadılar. Başka neyi lafettilär, neyä geldilär, Allahtan kaarä, birisi bilmeer.
Gagauziya Başkanın ofiţial saytında da ne buluşma için, ne da lafedilän konular için bişey yazılmadı hem açıklanmadı.
Foto – mae.ro
