TİKA proektına görä Çadır kasabasının 7-ci uşak başçasının imek yapılan blokunda ana remont işleri başladı. Remont 1,5 ayın içindä başa çıkarılacek.
İlktän neet vardı remontu bir ayın içinä başarmaa. Ama işä başladıynan belli oldu, ani, tehnologiyalara görä, işin zamanı uzayacek. Çünkü tavanın bir plitası çatlak çıktı. Onu enidän dökmää deyni lääzım oldu erleri sökmää da, taa maazadan temelä beton döküp, eni direkleri kaldırmaa. Beton tutulduktan sora da o direklerin üstünä eni plita dökmää.
Nicä bildirdi redakţiyamıza TİKA programaların Kişinev kordinatorluk Ofisin koordinatoru Canan ALPASLAN “TİKA kendi tarafından çalışêr, ani işlär dooru hem kaliteli yapılsın. Uşak başçasının imäk yapılan blokunda ana remont dünnää standartlarına uygun olacek, zerä burayı eni tertiplär hem oborudovaniye kurulacek”.
Not. Çadır kasabasının 7-ci uşak başçası 1968-ci yılda açıldı. Ozamandan beeri burada ana remont yapılmadı. İlkyazın, romın grantına görä, bu uşak başçasında yısıtma sisteması, kanalizaţiya hem su boruları diişildi.
