Harman ayın (avgust) 27-dä Moldova Respublikası kendi baamsızlık Gününü kutladı. Bu pek paalı bir yortu, zerä 24 yıl geeri, 1991-ci yılda bu gündä Moldova Respublikasının Parlamentı kabletti baamsızlık için Deklaraţiyayı da Moldova kendi başına bir devlet oldu.
Kutlamalar başladı Moldova öndercilerinin Ştefan şel Mare pamätniinä hem Kişinevun “Etirnitate” aşker şan Memorialına çiçek hem venok koyulmasından.
Sora, baamsızlık Gününnän ilgili yortulu sıralar Kişinevun baş meydanında geçtilär. Sıralar milli kostümnarın paradından çeketti. Bu paradta Gagauziyadan “Kadınca” ansamblisinin artistları da pay aldı.
Sora meydana Romıniyanın büük bayraanı getirdilär da taa ötää baamsızlık Günü yortusu bu bayraan altında geçti. Bu bayraan önündä kutlama sözlerinnän vatandaşlara danıştılar Moldovanın öndercileri da: Parlamentın başı Andrian KANDU, kultura ministrusu Monika BABUK hem başkaları.
Kutlama sözlerindän sora, hepsi ansamblilär tutundular da oynadılar meydanda büük bir “Hora Mare”. Nedän sora sţenadan büük bir konţert başladı, angısında pay aldılar Moldovanın herbir köşesindän gelän ansamblilär. Bu konţertta pay aldı “Kadınca” ansamblisi (önderci Avraam KÖSÄ) hem onun solistkası Mariya KISA.
Karannık çöktüynän meydanda konţertın ikinci payı başladı: simfonika hem estrada muzıkası hem nomerleri. Baamsızlık Günü başarıldı yortulu feyerverklan.
Harman ayın (avgust) 27-dä Moldova Respublikası kendi baamsızlık Gününü kutladı. Bu pek paalı bir yortu, zerä 24 yıl geeri, 1991-ci yılda bu gündä Moldova Respublikasının Parlamentı kabletti baamsızlık için Deklaraţiyayı da Moldova kendi başına bir devlet oldu.
