2026-cı yılın Küçük ayın 10-da Komrat Kultura evindä geçti kultura uurunda toplantı, neredä Gagauziya kultura Upravleniyası 2025-ci yılda yapılan çalışmaların sonuçlarını inceledi hem nereyi katıldılar Kultura evlerin, bibliotekaların, muzeylerin, muzıka hem yaratmak evlerin, teatruların öndercileri, yaratmak ansamblilerin temsilcileri, yazıcılar hem Gagauziya avtonomiyasının başka kultura izmetçileri.
Toplantıda Gagauziya kultura Upravleniyasının başı Marina SEMÖNOVA, bir saat nasat ederäk, annattı hem ekrannardan insan önünä sürdü Gagauziyada kutura uurunda bir yılın içindä yapıldıı işleri hem şannı başarıları.
Selämnama hem kutlama sözünnän kultura zaametçilerinä danıştı Gagauziya İspolkomu Predsedatelin yardımcısı İlya UZUN da, angısı Gagauziya kultura Upravleniyasının 2025-ci yılda yapılan çalışmalarını pek üüsek uurda buldu. Canabisi urguladı, ani çalışmaların başarılı olması, belli ki, yapıldı çndä Gagauziya kultura Upravleniyasının başı Marina SEMÖNOVA olarak, hepsi kultura izmetçilerin çalışmasınnan hem Gagauziya İspolkomu yardımnarlan.
Bundan sora, sțenaya genä buyur edilän Gagauziya kultura Upravleniyasının başı, 2025-ci yılda önemni kultura olaylar uurunda ödülleri verdi.
“Gagauz dilinin kullanmak sferasının genişledilmesi için” Zakonuna görä, Gagauziya kultura Upravleniyası tarafından yapılan “Lääzımnı kiyat – 2025” konkursunda nominațiyalarda ödüllär verildi:
1. “En islää peet toplumu”:
– uşaklara deyni – “Uşaklara deyni peetlär”, avtor Todur MARİNOGLU;
– büükerä deyni – “Kaderimin sedefleri”, avtor Olga İVOGLO;
– büükerä deyni – “Lüzgerä karşı”, avtor Aleksandra KRİSTOVA (Yularji).
2. “En islää proza toplumu”:
– uşaklara deyni – “Gagauz masalları: Masaldan masala”, avtor Todur ZANET;
– büükerä deyni – “Ana-boba evi”, avtor Konstantin KURDOGLO.
3. “Dokumental publițistika” – “Dedelerin diveç sesi”, avtor Konstantin KURDOGLO.
4. “Yılın yazıcısı” Literatura premiyası – yazıcı Todur ZANET.
5. “Yardım ödülleri”:
– “Sevdim, severim, sevecäm”, avtor Alöna ERGOGLO;
– “Seslä, canım…”, avtor Kristina KOÇAN.
Sora, Gagauziya kultura Upravleniyası tarafından seçilän 2025-ci yılın en ii kultura kuruluşlarına, kolektivlarına hem anılmış kultura adamnarına özel ödüllär hem “Şükür belgeleri” verildi:
“2025-ci yılda kultura proektların hem inițiativaların ilerlemesi uurunda çalışmaklar için” ödül hem “Şükür belgisi” verildi Kazayak Kultura evinä – direktor Mariya TAKA.
“2025-ci yılda bibliotekaların arasında verimni işbirlii için” ödül hem “Şükür belgisi” verildi Çeşmä küüyün cümne bibliotekasına – direktor Anna ŞÇERBAN.
“Uşak muzıka şkolaların arasında 2025-ci yılda en büük başarılar için” ödül hem “Şükür belgisi” verildi Çadır kasabasının uşak muzıka şkolasına – önderci Olga ŞALAMAK.
“2025-ci yılda “Örnekli” kolektivların arasında verimni işbirlii için” ödül hem “Şükür belgisi” verildi “Düz Ava” halk oyunnarı uşak studiyasına – öndercilär Nikolay PULUKÇU hem Marina NİKİTOVA.
“2025-ci yılda verimni işbirlii için” ödül hem “Şükür belgisi” verildi “D. Tanasoglu” adına gagauz milli teatrusuna – direktor Mihail GAGAUZ.
“2025-ci yılda verimni işbirlii için” ödül hem “Şükür belgisi” verildi resimci Konstantin KELEŞä.
“2025-ci yılda verimni işbirlii için” ödül hem “Şükür belgisi” verildi Gagauziyanın Resimcilik Regional Galereyasına – direktor Lübov GAVRİLOVA.
“2025-ci yılda verimni işbirlii için” ödül hem “Şükür belgisi” verildi Komrat kasabasının Kultura evin uşak vokal kolektivına – önderci İrina MELKAN.
Ayırıca, Gagauziya kultura Upravleniyası kutladı Avdarma küüyün istoriya muzeyini (direktor – Olga TRANDAFİLOVA) hem Çadır kasabasının Birleşik kultura merkezin direktorunu Janna PAŞALIyı Moldova devleti tarafından kabledilän büük ödüllärlän.
