Ceviz ayın (sentäbri) 25-28 günnerindä Türkiyenin Elaziğ kasabasında 22. Hazar Şiir Avşamnarı yapıldı. Avşamnara katıldılar poetlar Azerbaycandan, Gagauziyadan (RM), Gruziyadan, İraktan, Kazahstandan, Krımdan, Kirgiziyadan, Kipradan, Tatarstandan (RF), Uzbekiatandan, Türkiyedän.
22. Hazar Şiir Avşamnarın adandı Türkiyenin İnceğiz küüyündä duan anılmış Vatan hem Bayrak poetına Arif Nihat ASYAya, çok patriotik peetlerin avtoruna. Avşamnarın teması “Bayrak” konusu oldu.
Programaya görä bu gözäl meropriyatiyanın ilk günündä Elaziğin “Nurettin Ardıcıoğlu” Kultura Merkezindä “Poetların imza günü” oldu, neredä poetlar okuyculara kendi kiyatlarını imzaladılar.
Ertesi günü Kultura Merkezindä TÜRKSOY resimcilär hem “Elaziğ Şehitleri Fotografı” sergileri açıldı. Resimcilär sergisindä Gagauziyadan Dimitriy SAVASTİNın hem Olga UNGURÄNUnun resimleri da vardılar.
Bu açılıştan sora Kultura Merkezin büük salonunda Prof. Dr. Saadettin YILDIZ “Bayrak” için bir doklad tuttu.
Üülendän sora Elaziğin ana sokaanda “Şairlerin Örüyüşü” oldu. Başta Elaziğ Valisi Ömer Faruk KOÇAK, Elaziğtän Türkiye Büük Meclisin deputatları Şuay ALPAY, Sermin BALIK, primarın yardımcısı Azim NAZIRLI, Elaziğ Fırat Universitetın rektoru Kudbettin DEMİRDAĞ, Avrazya Yazarlar Birliin başkanı Yakup ÖMEROĞLU, 10 devlettän gelän poetlar, Elaziğ insannarı, üürencilär hem üüredicilär.
İlerdä büük türk Bayraa, hem orkestra olarak, örüyüş Elaziğin PTT meydanında bitti. Bu meydanda 22. Hazar Şiir Avşamnarın ofiţial açılışı yapıldı.
Ertesi günü poetlar grupalara bölündü da Baskil, Kovancılar, Palu hem Sivirce rayonnarına gittilär, neredä üüredicilärlän hem üürencilärlän buluştular.
Programaya görä taa iki toplantı oldu: “Edibiyatımız hem edebiyat dergileri” (“Literaturamız hem literatura jurnalları”) hem “Arif Nihat ASYA hem Bayrak” paneli (Moderator Prof. Dr. Esma ŞİMŞEK).
Avşam üstü kultura merkezindä “Kürsübaşı” muzıka hem oyun programası gösterildi. (“Kürsübaşı” adeti ÜNESKO tarafından dünnää kultura zenginii olarak kabledilmiş).
22. Hazar Şiir Avşamnarın Elaziğ Fırat Universitetın Atatürk kultura Merkezindä “HAZAR ŞİİR AVŞAMNARI” programasınnan başarıldı, angısına hepsi poetlar (Gagauziyadan poet Todur ZANET) katıldılar hem kendi peetlerini okudular. Salonda bütün türk dünnäsının (Gagauziyanın da) bayrakları dikiliydi.
Programanın sonunda Kazahstanın büük poetın Ulıkbek ESDAULETin 60-cı yıldönümünnän kutlamalar oldu. Kazahstan poetına Elaziğ Valisi Ömer Faruk KOÇAK tarafından ödül verildi. Ulıkbek ESDAULET ta kendi baaşışlarına (kazah milli rubalarını hem şapkalarını) valiya hem deputatlara baaşladı.
Anaktar sözlär : Elaziğ
