Hederlez ayın 18-dä Ukraynanın Odesa bölgesinin Teplodar kasabasında oldu “Miili imeklär” regional festivali, neredä pay aldılar Kurtçu küüyündä bulunan Odesa bölgesinin Gagauz kultura merkezin zaametçileri da.
Merkezimizin insannarı Anastasiya ÇOBAN, Olga KULAKSIZ, Lüdmila PİRKOVA, Ekaterina TAUŞANCI, Anna MOLLA, Raisa ÇAPKIN tanıştırdılar teplodarcılıları hem festivalin musaafirlerini gagauz halk imeklerinnän: don kaurmaylan, sarmaylan, fasüleylän, kıırmaylan, gevreklän ,lalangıylan, kurban-bulgurlan, çörek pitaylan, kalläylän, turşuylan, cızlı mamaligaylan, kabaklıylan, gözlemäylän, piinirlan.
E nesoy sofra var nica olsun içkisiz? İçkilär da bunnardı: şarap, rakı, konyak, foşaf.
Gagauz halk imeklerini pek beendilär nicä jüridä ollannar, öla dä teplodarcılılar da.
Bu festivaldä gösterildi azerbaycan, ukrayna hem taa başka halkların imekleri da. Jürinin azaları dedilär: “Gagauzların imekleri – datlı imeklär!”
Azerbaycan halk imeklerini sergiyä deyni hazırladılar restoranda çalışannar, ama bizim, gagauz halk imeklerini, hazırladık biz kendimiz. Yaptık onnarı o reţeptlerä görä, angılarını üürendidik analar-bobalarımızdan, angılarını hergün yapêrız aylemizä, uşaklarımıza, unukalarımıza.
İsteerim biraz üünmää! Bu yarışamakta Gagauz kultura merkezi kazandı ikinci eri!
Alarak esaba, ani ilk er azebaycannılarda da o imeklär hazırlandılar restoranda, bizim diil pek kötü çalışmamız!
Olga KULAKSIZ, Odesa bölgesinin Gagauz kultura merkezin direktoru
