2022 yılın Türk dünnäsı kultura başkasabasında Bursada, bu kasabanın baş primariyası saabiliindä hem TÜRKSOYun (Halklararası türk kulturası kuruluşu) katkısınnan, Harman ayın (avgust) 30-zu – Ceviz ayın (sentäbri) 1-ri günnerindä geçti “II-ci Bursa halklararası duhovoy ansamblilerin Festivali”, nereyi Azerbaycan, Gagauziya (Gagauz Yeri), Kazakistan, Moldova gibi memleketlerdän hem Türkiyenin çeşitli kasabalarından orkestralar katıldı.
Festivalin programası Harman ayın (avgust) 30-da Bursa Atatürk pamätniindän orkestraların kasaba içindä kortej örüyüşünnän başladı. Avşam saatlarında da Bursanın Hüdavendigar Kent Parkında düzennenän konțert programasınnan ilerledi. Konțertta sțenaya alınan Haydar Aliyev asker institutun orkestrası, Kazakistan Prezidentın asker orkestrası, Moldova Zaim orkestrası, Yuriy TARANENKO önderciliindä Gagauziya (Gagauz Yeri) Başkannık orkestrası bursalılara gözäl muzıkalı bir gecä yaşattılar.
Türkiyenin “30 Ağustos Zafer Bayramı” (“Harman ayın (avgust) 30 Enseyiş yortusu”) günü özel konțertlan başlayan festivalin açılış konțertindä nasaat edän TÜRKSOY temsilcisi Dr. Cavid MÖVSÜMLÜ, TÜRKSOY Genel Sekretari Sultan RAEVın selamnarını getirdi hem da onun adından orkestralar şeflarına festivalin plaketlarını verdi.
Festivalin ikinci günündä, orkestraların öneticileri hem şefları Bursanın baş primarınnan Alinur AKTAŞLlan buluşturlar, neredä Canabisi şükür etti orkestralara festivalä katılmaları için hem TÜRKSOYya da Festivalä katkıları için.
Festivalä katılan orkestracılara deyni zengin bir kultura programası hem Osmannının ilk başkasabası olan hem da 2022 yılın Türk dünnäsı kultura başkasabasınnnan Bursaylan tanışma gezileri yapıldı, bidirer https://www.turksoy.org/.
