Ceviz ayın 8-10 günnerindä Bulgariyanın Kiten kasabasına olan «Фолклорен Изгорев» halklararası etno festivalindä büük başarıylan hem ödüllenmäylän pay aldı Caltay küüyün gimnaziyasının “Mercanka” uşak ansamblisi. Büün bu ansambli için annadêr onun kurucusu Caltay gimnaziyanın iştä hem ustalıkta pedagogu Evdokiya Petrovna PETKOVİÇ.
Büük hodulluum var bizim Caltay küüyün talantlı ușakları icin. Taa eveldän bu küçük küüyümüzün insanı anılmıș oldu sevgiliklän, hatırlıklan hem talantlıklan, türkücülüktän hem oyunculuktan. Küüyümüzün insanı becerer çok türlü gagauz oyunnarını oynamaa, çok türkülär evelki zamannardan tutêrlar aklılarında. Bunnarı hepsini savașêrlar üüretmää kendi ușaklarını. Biz dä şkolalarda üürederiz hem kullanêrız çok adetlär: eski turkuleri, oyunnarı, sıraları, kulturayı hem tradițiyalarını gagauzların hem küüyümüzün.
Herbir oyunun var kendi uurunda kullanması: “Karșı havası”nı kullanêrlar karșılamaa musaafirleri, düüncüleri hem hatırlamaa saadıçları sofrada. “Kirața havası”nı oynêêrlar çok sıralarda șennik icin. Hertürlü horular var: “İki tarafa horu”, “Düz horu”, “İki bacak horu”, “Fırli horu”su hem çok bașka horular, angılarını kullanêrlar sıralarda șennik için.
Herbir oyunu üürettim ușakları taa küçüktän. Pek zordu onnara bu işi üürennmää, ama küçüktän bildiynän, sora taa kolay olêr ileri dooru. Zordu bacaklarını kıpırdatmaa onnara, havayı tutamazdıar. Șindi, șükür Allaha, oynêêrlar.
Bütün ureklän istärdim bilsinnär herbir gagauz oyununu. Birkaç yıl çalıștım onnarı üüretmää, bakmadım, ani parasız, ani vakıdı harcadım. Sora düşündüm vermää bu ansambliyä bir ad. Yaklaștım gimnaziyanin direktoruna – Nataliya İvanovna DEMIRä. Sıraladım birkac ad da o da bana dedi: “Koyalım – “Mercanka””. Ondan sora Canabisi ekledi: “Ad verdik, ama vereyim sana bir dä krucok – «Народные танцы»”. Sän hep okadar onnarlan zanaatlanêrsın, vakıt kaybedersin”. Bän dä halizdän kayıl oldum.
Hodullanêrım, ani “Mercanka” ansamblisini bän ilkin üürettim oynamaa hem hepsi gagauz oyunnarını. Sora onnarı aldi Pötr İvanoviç PETKOVİÇ, oyun üüredicisi oldu Nikolay Födoroviç SAROV. Büünkü gündä dä zanaatlanêr bu oyuncularlan. Bän dä duvacı olêrım onnar için. Sevineerim, ani çekettilä yabancı erlerä gitmää, çok ödül kablettilär, aldılar üüsek erleri, bașka yıllarda da. Şindi da sevinerim, ani Bulgariya kasabasında olan «Фолклорен Изгорев» halklararası etno festivalinä gittilär da orada en üüsek erleri aldılar hem, ayırıca, bizim gagauzların oyunnarını ilerletmak için dä ödüllendilär. Onnar için pek sevineriz, hem hodullanêrız, ani gimaziyamızda var bölä talantlı uşaklar!
Umutlanêrız, ani ileeri dooru “Mercanka” ansablimiz taa çok ödüllär kazancek, bizi dä sevindirciklar hem gagauz oyunnarını hem kulturasını dünneyä tanıdaceklar.
Allaa onnara yardımcı olsun, onnar șannı olsunnar, da bilinsinnär hem Gagauziyada da, hem aşırı erlerdä dä!
Caltay gimnaziyanın iştä hem ustalıkta pedagogu Evdokiya Petrovna PETKOVİÇ
