Hederlez ayın (may) 6-da Gagauziya hem gagauz halkı kutladı bizä dedelerimizdän kalma gagauzların en büük hem maanalı milli yortularıdan birisini – Hederlez yortusunu, angısı “Canavar yortuları” hem “Kasım” gününnän bir uurda bulunêr.
Gagauziyanın Hederlez yortusunun kutlamasının ana sırası yapıldı Çadırdakı “At-prolin” tamazlık at fermasının aulunda hem ipodromunda, nereyi Gagauziyadan 12 küü kendi aullarını kurdu hem gagauz milletini temsil etti. Ama, neçin sä, Gagauziyaya diil, ama Moldovanın bu günkü kuvetlerinä izmet edän hem ayırımcılıı yapan primarlar hem Moldova parlamentın kendilerinä “Büük gagauz” deyän deputatları bu kutlamaya gelmedilär. Taa da beter, Moldova kuvetlerinä “Ayır – buyur!” politikasını kolaylaştırmaa deyni, onnar, annamadaan mı, pek islää annayarak mı, kendi yaptıklarınnan bizi, gagauzları, millettän toplulaadan düşürmää deyni, Moldovanın öndercilerinä kolaylıı verdilär.
Örnek olarak, Çadır kasabasının parkında, Moldova Pravitelstvosunun Etnika arası ilişkileri Agenstvosunnan ortaklıkta, Çadırın primariyası tarafından yapılan gagauz milletin Hederlez yortusu, var nicä demää bulgar halkın yortusuna döndürülmüştü, çünkü katılannarın taa çoyu bulgar küülerindändi.
Burayı Moldova premyer-ministrusu Dorin REÇEAN da buyur edilmişti, angısı, Gagauziyanın Hederlez yortusunun ana sırası yapılan erä iki kilometra etişmeyip, gagauzlara “comunității găgăuze” (gagauz topluluu – nışan AS) hem “fiecărei etnii” (herbir etnika grupası – nışan AS) deyip, çadırlıları gagauzların Hederlez yortusunnan kutladı.
Hep bölä bir kutlama “comunității găgăuze” (gagauz topluluu – nışan AS) insannarına Moldova Prezidentı Maya SANDU da yollamış.
Bileriz, ani bizä gagauz milleti demäk için Moldova öndercilerinin dilleri dönmedii için, onnar bizi türlü şeylär yaptılar: millettik – halk yaptılar, halktık – “etnika grupası” yaptılar, etnika grupasıydık – “azınnık” yaptılar, azınnıktık – üülen tarafta yaşayan yaptılar, üülen tarafta yaşayandık – topluluk yaptılar. Topluluk ardına taa ne çıkaraceklar?
Akademik hem poet Todur ZANET, Gagauz Millli Gimnanın avtoru
