Canavar ayın 13-dä Moldovada hem Gagauziyada iş hem tanışmak vizitannan bulunan Türk İşbirlii hem Koordinaţiya Agenstvosu Başkannıı (TİKA) Başkan yardımcısı Yahya COŞKUN, bir tanışmak vizitınnan, Kongaz küüyün Todur ZANET adına Teoretika lițeyindä bulundu.
TİKA Başkan yardımcısı Yahya COŞKUNu hem onunnan barabar lițeyä gelän Komrat Türkiye Respublikasının Başkonsulu Eda GÜÇü üürencilär, Gagauz Millli Gimnanın avtoru Akademik Todur ZANET, lițeyin direktoru Marina ÇEBANOVA hem lițeyin administrațiyası tarafından tuz-ekmeklän hem çiçeklän karşılandılar hem, musaafirlär içeri buyurulduu zaman, onnara deyni sefa süreräk, “Altın çöşmä” uşak oyun ansablisinin oyuncuları bir gagauz halk havasına görä oyununan şennik yaptılar. Oyuncularlan ortak patrettän sora, Akademik Todur ZANET hem lițeyin direktoru Marina ÇEBANOVA buyur ettilär paalı musaafirlär üüredicilik kuruluşunnan tanışsınnar.
İlkin TİKA Başkan yardımcısı Yahya COŞKUN, Başkonsul Eda GÜÇ hem Canabilerin yanında bulunan TİKA Kişinev ofisin koordinatoru Murat ZELAN buyur edildilär tanışsınnar lițeyinä TİKA tarafından yapılan hem başarılan büük bir Proektın işlemesinnän – fizika, himiya hem biologiya Tehnoklas inovațiya klasların çalışmasınnan. Burada Canabilerin kolayı oldu himiyada bir urokta, üürencilärlän hem üürediciylän lafetsinnär hem, belli ki, uşakların hem üüredicilerin saygıylan sölenän şükür sözlerini işitsinnär.
TİKA Başkan yardımcısı Yahya COŞKUNun muzeylerä hem muzeycilää sıcak duygularını bileräk, Canabisinä lițeyin muzeyi dä gösterildi. TİKA Başkan yardımcısı muzeyin yanında bulunan sport zalına da giridi hem burada voleybolcuların trenirovkasına siiretti.
Lițeylän tanışmaktan sora, hepsi buyur edildi bir çay-kıırma-döşemä sofrasına, neredä TİKA Başkan yardımcısı Yahya COŞKUN, açıklayarak kendisini TİKAda Orta-Dou, Balkannar hem Dou Avrupa alannarında kalkınma, saalık, üüredicilik hem kultura işbirlii proektlarından cuvapçı olduunu hem onnara koordinatorluk etmesini, annattı bu alannarda TİKAnın çalışmalarını, can acısınnan Siriyanın durumunu hem Gazada musumannarın soy kırımını belerteräk.
Yahya COŞKUN açıkldı, ani büünkü gündä TİKAnın çalışmaları 170 devlettä yapılêr hem, neredäysä, bütün dünneyi kaplêêr. Canabisi urguladı, ani bu çalışmalar Moldovada hem Gagauziyada da durgunmayaceklar hem ilerleyeceklär. Burada proektların arasında en önemnisi da gelän yıla Gagauziyada “Recep Tayyip ERDOĞAN” industriya kolecın açılması, angısına büük umutlan beklener Türkiye Prezidentı Recep Tayyip ERDOĞANın da katılması.
Kendi tarafından Gagauz Milli Gimnanın avtoru Akademik Todur ZANET, TİKAnın Gagauziyada yaptıı herbir uurda, başlayıp üüredicilik hem terbiedicilik proektlarından taa saalık, üüredicilik, ekonomika, kultura hem cümne kalkınma proektlarına kadar, saygıylan şükür etti Türkiye Respublikasının öndercilerinä hem TİKAnın Başkannarına, kurulmasından bu günädän onnarın adlarını anarak: Umut ARIKa, Orhan GÜVENENä, Öner KABASAKALa, Hakan FİDANa, Musa KULAKLIKAYAya, Serdar ÇAMa, Serkan KAYALARa, Abdullah ERENä. Ayırıca saa ol dedi eski TİKA Başkan Yardımcısına Dr. Mahmut ÇEVİKä, ani Balkannar hem Dou Avrupa iş birlii proektları koordinațiyalarını yaptıı zaman, Gagauziyada hem Moldovada proektları da ön planda tuttu.
Bu şükür sözlerindän sora, Todur ZANET umut etti, ani ileri dooru da bu yardım proektların sinciri kopmaz, ama taa da kaavileşir hem genişlenir.
Buluşmanın sonunda Todur ZANET baaşladı Yahya COŞKUNa TİKA yardımınnan hazırlanan 6 tomnuk “Büük Gagauzça-Rusça Sözlük” takımını, kendi literatura hem bilim kiyatlarını, angılarının çoyu hep TİKA yardımınnan tiparlandı, hem da sükür etti herbir iştä hem eni proektlarda arka olmaları için.
Lițeyin direktoru Marina ÇEBANOVA da baaşladı üüsek musaafirlerä lițeyin emblemasını taşıyan ödülleri.
Aylä patretlerindän sora, lițeyin o günkü üüsek musaafirleri TİKA Başkan yardımcısı Yahya COŞKUN, Başkonsul Eda GÜÇ hem TİKA Kişinev ofisin koordinatoru Murat ZELAN saygıylan yola uurlandılar.
