2025-ci yılın Orak ayın (iyül) 15-dä, ilktän Türkiye Kişinev Büükelçiliindä, sora da Gagauziyanın Çadır kasabasının “İzmit kardaşlık parkında” kurunan 15 Temmuz şehitlerinä anmak nışan taşın yanında 2016-cı yılın 15 Temmuz (Orak ayın (iyül) 15-şi) gecesi Türkiyedä FETOcular devlet devrimi denemesinä karşı koyan kahramannıın anması hem 15 Temmuz (Orak ayın (iyül) 15-şi) günün “Demokratiya hem Milli Birlik Günü” bakılmasının 9-ci yıldönümünän bakıldı.
Türkiye Kişinev Büükelçiliindä 15 Temmuz “Demokratiya hem Milli Birlik Günü”nün bakılması sırasına, başta Türkiye Kişinev Büükelçisi Uygar Mustafa SERTEL hem TC Kişinev Büükelçiliin diplomatları, Türk İşbirlii hem Koordinaţiya Agenstvosu (TİKA) Kişinev ofisin koordinatoru hem zaametçileri, akademik hem yazıcı Todur ZANET hem başka insannar katıldılar.
Gagauziyanın Çadır kasabasının “İzmit kardaşlık parkında” kurunan 15 Temmuz şehitlerinä anmak nışan taşın yanında yapılan “Demokratiya hem Milli Birlik Günü” sırasına sa katıldılar Türkiye Kişinev Büükelçisi Uygar Mustafa SERTEL hem Türkiye Kişinev Büükelçiliin diplomatları, Türkiye Gagauziya Komrat Başkonsulu Adnan HAYAL hem başkonsulluk personalı, Türk İşbirlii hem Koordinaţiya Agenstvosu (TİKA) Kişinev ofisin koordinatoru Tarık METE hem TİKA zaametçileri, Gagauziya Halk Topluşun Başı Dimitriy KONSTANTİNOV hem GHT deputatları, Gagauziya İspolkomu predsedatelin yardımcısı Viktor PETROV hem İspolkom azaları, Çadır rayon administrațiya azaları, başka insannar.
