“Tarapaka” ya da “Atakama Devi” – bu Çili devletin Atakama çolun “Cerro Unitas” yamacında bulunan hem büünkü günädän dünnedä en büük olan bir dev antropomorf geoglifı (wikipediyaya görä – 86 metra uzunnu hem 40 metra genişlii boyunda) sayılêr.
Uydurma teoriyalara görä, bu antropomorf geoglifı peydalanmış eni eradan 1500 yıl (kimi bilgilerä görä 9000 yıl) öncä hem onun yapılmasında pay almışlar Tivanako denilän kultura zamanında yaşayannar hem inkalar halkı.
Erindeki legendaya görä Tarapaka – bu bir Tanrı. Tarapaka Tanrısı, brakıp büünkü Peru devletin Titikaka gölünü, yollanmış Çili devletin poyraz tarafına, burada yaşayan kızıl derileri korumak için. Onuştan o indeețlar kendilerinin pagın Tarapaka Tanrının simasını “Cerro Unitas” yamacında yapmışlar.
Ama bundan kaarä büünkü gündä “Tarapaka” geoglif için başka türlü fikirlär dä ortada dolaşêr: kimisi deer – bu bir şaman figurası, kimisi deer – bu UFOlara yol gösterän çizi, kimisi deer – bu bir robot figurası, kimisi deer – bu skafandraya giimni bir kosmonavt figurası.
Esaba alarak, ani Rim Papası kendi önnüünä Tarapaka simasını dikmiş hem onu önä sürmüş, gene dä bu bir Tanrıdır. Pagın tanrısı da olsa – Tanrıdır. Zerä o Tanrı olmaydı Rim Papası kendi önnüündä onu dikmeyeceydi hem önä sürmeyeceydi. Bu dikiş hem önä sürmäk ortada birkaç soruş peydalandırêr: Tarapaka kimin Tanrısı: inkaların mı, Vatikanın mı? Vatikanın sa, ozaman katoliklik ne demäk? Pagın Tarapaka Tanrısı hem Vatikanın arasında ortak bir iş var, demäk. Acaba ne işidir?
Akademik Todur ZANET
