Gagauzların Kasım yortusu günündä, Kasım ayın 7-dä, Çadır kasabasının № 1 “Vasilök” (gag: “Mitliga”) uşak başçasında geçti pek meraklı hem sevindirici bir sıra – “Kasım festivali”, angısı “İki koltura – bir ruh” proektı kanadı altında oldu hem Moldova kultura ministerlii tarafından açıklanan “Kulturaya Kauşmak – 2025” („Acces la Cultură – 2025”) Milli programasının çerçevesindä yapıldı.
“Kasım festivali” sırasına katıldılar Çadır kasabasının may hepsi uşak başçalarından ön hazırlama grupalardan uşaklar. Gözäl hem kıvrak beceriklii önä sürän terbiedicilär hem uşaklar başarabildilär bu festival haliz bir Kasım yortusuna dönsün hem gagauz kulturasının, adetlerinin hem uşak yaradıcılıın başarısı olsun.
Festivali geçirilän odada, dedelerin adetlerinä hem sıralarına saygı göstereräk, uşaklar gagauz halk türkülerini çaldılar hem oyunnarını oynadılar, peet okudular, güzlän hem Kasım yortusunnan ilgili sıraları gösterdilär.
Çadır kasabasının № 1 “Vasilök” (gag: “Mıtliga”) uşak başçasının administrațiyası şükür etti hepsi pedagoglara, ana-bobalara hem uşaklara “Kasım festivali”n hazırlanması hem ona katılmaları için, kulturamıza saygı hem sevgi için.
Gözäl bu “Kasım festivali”n şannı musaafirleri oldular Gagauziya üüredicilik Upravleniyasının temsilcisi, Çadır “Valentin Moşkov” lițeyin üüredicileri hem Çadır kasabasının uşak başçalarının direktorları.
Snejana DEMİRBAG, Çadır kasabasının № 1 uşak başçasının gagauz dilindä üüredici terbiediciykası
