2026-cı yılın Büük ayın 12-dä Komrat Kultura evindä geçti “Kolada adetleri – 2026” Regional festivali, angısı her yılın, ortak olarak, hazırlanêr Kaul-Komrat Eparhiyası, Gagauziyanın kultura hem üüredicilik Upravleniyaları tarafından hem adanêr o Kolada, “Hêy-hêy” hem “Çıbık günü” (“Surva”) gibi Yıl başı yortularına.
“Kolada adetleri – 2026” Regional festivalin açılışında, popazlara hem onda pay alannara danıştı Komrat İoan Vatizedici klisesinin popazı Ay-Boba Födor KARABACAK: “Sevgili bizim popazlarımız, sevgili hem gözäl bizim paalı insanımız hem uşaklar. Büünkü gündä biz hepsimiz toplandık burada, bu Dom kulturada, neredä isteeriz metetmää bizim Allahımızı, Hristozu, angısı duudu da bizim uşaklar büünkü gündä hepsi hazırladı kim şiir, kim birär türkücük – kim naşey üürendilär. Da bu pek paalı hem önemni bir iş, neçin deyni kendi saabi İsus Hristoz bizä var bir örnek, nicä o duumuş, kim ona ilk yaklaşmış. Bizä deyni var pek önemni hem saygılı bir primer, ani “vot eta prostota”, angısını kendi Hristoz küçüklüündän gösterer bizä – bizä deyni bu var pek önemni üüredici bir iş. Biz, popazlar, pek sevineriz te buna, ani bizim uşaklar savaşêrlar üürenmää da metetmää kendi pak üräännän, kendi pak fikirinnän Saabi İsus Hristozu. Bän pek isteerim şükür etmää bizim popazlara, angıları savaşêrlar bizim uşaklara üüretmää, şükür ederim te o uçtililerä, angıları şkolada savaşêrlar üüretmää uşaklara bu işi. Neçin ki büünkü gündä olêr zor. Pek çok var zarar tarafından türlü “nastavleniyalar”. Uşaklar çok işlär görerlär, ani diil islää hristiyannaa deyni, diil islää bizim yaşamamıza deyni – türlü kirlilik işlär. Te uçtililerä, ani savaşêrlar uşakları üüretmää, batüşkalar savaşêrlar üüretmää, Allaa versin onnara kaavi inan, saalık da onnarın üreklerindä herkerä olsun te bu te sıcaklık Allahın tarafına deyni”.
Bu danışmadan sora zalda bulunan hepsi popazlar hem insannar, ayaa kalkıp, yaptılar hem okudular Allaha metinni bir dua.
Bundan sora hayırlamak hem kutlamak sözünnän “Kolada adetleri – 2026” Regional festivalindä pay alannara danıştı gagauz yazıcısı, “Ana Sözü” gazetanın baş redaktoru, Akademik Todur ZANET: “Pek sevinerim, ani bizdä hepsimizdä var bölä bir büük yortu – Kolada, angısı Yıl başı yortularından en büüyü. Pek gözäl, ani Gagauziyada bölä festivallär yapılêr da bizim kanımız, dilimiz, dinimiz yaşêêr, veriler eni evlatboylarına. Bän şükür ederim bizim Kliseyä, klisä izmetçilerinä, popazlara, şükür ederim Gagauziya kultura Upravleniyasına, şükür ederim Gagauziya üüredicilik Upravleniyasına, şükür ederim hepsi üüredicilerä hem kultura izmetçilerinä, ani saymêêrsınız zaametinizi da bölä büük iş yapêrsınız. Zerä, nicä belli olêr yıl-yıldan, üstümüzä büük dalgalar geler, büük baskılar geler. O baskılara lääzım karşı koyalım. Sade dilimizlän hem dinimizlän bu baskılara karşı durabilecez. Büün sizä hepsinizä başarılar, şennik hem bu şenii, bu paklıı, ani büün verer Kolada, taşıyasınız ileri dooru”.
Sora, biri-biri ardı sțenaya çıkan Gagauziyanın klisä şkolalarından, üüredicilik kuruluşlarından hem ansamblilerdän uşaklar hem insannar çaldılar “Kolada” türkülerini, “Hêy-hêy” söledilär hem “Çıbık günü”nä (“Surva”) hazırlanan türkülar çaldılar. Bu iştä pay aldılar: Aydar küüyün “Födor Angeli” gimnaziyasının üürencileri; Başküüyün (Kirsova) “Mihail Tanasoglu” gimnaziyasının üürencileri; Baurçu küüyün Kultura evinin “Genç seslär” yaradıcılık kolektivı; Caltay küüyün Ayoz Troiţa klisä şkolası; Beşgöz küüyün “Dernek” folklor ansamblisi; Çadır kasabasının “Mihail Guboglu” teoretik lițeyin koladacıları; Çeşmä küüyün teoretik lițeylerin trillicileri; Dizgincä küüyün “Kolokolçik” ansamblisi, Ayoz Troiţa klisä şkolası; Kazayak küüyün “Duygum” halk muzıka orkestrası, “Sevda” folklor ansamblisi hem teoretik lițeylerin üürencileri; Kıpçak küüyün “Semön Baranovskiy” teoretik liţeyin üürencileri; Kongazçık küüyün gimnaziyası; Komrat İoan Vatizedici klisä şkolası hem Komrat “Nikolay Tretyakov” teoretik liţeyi; Komrat Kultura evin “Bürüncük” uşak teatrusu; Komrat kasabasından “Poläki Bucaka” halk oyun ansamblisi; Kongaz küüyün “Altın Çöşmä” oyun ansamblisinin oyuncuları, “Taraf” halk muzıka orkestrası hem “Todur ZANET” teoretik liţeyin koladacıları; Kongaz küüyün “Varvara Topal” gimnaziyası; Valkaneş kasabasının klisä şkolası, Valkaneş kasabasının “Yıldızlar” halk oyun ansamblisi; Ütülü küüyün “Saveliy Ekonomov” teoretik liţeyi.
“Kolada adetleri – 2026” Regional festivalini hazırlayannar hepsi katılan kolektivlara Metinnik diplomnarı verildi hem yortulara uygun birär sepet dolusu tatlılıklar hemdä kovriklär dizisi baaşlandı.
Festivalin kapanışında Komrat İoan Vatizedici klisesinin popazı Ay-Boba FÖDOR, bu festivalin hazırlamasında hem hristiyannık zenginnerimizi korumasında çalışmaları Gagauziya kultura Upravleniyasının başı Marina SEMÖNOVAya, Gagauziya üüredicilik Upravleniyasının başı Natalya KRİSTEVAya hem bu upravleniyaların kimi zaametçilerinä Kaul hem Komrat episkopu ANATOLİYin adından Diploma hem Çift ikona takımnarını baaşladı.
