Kırım ayın 21-dä Gagauziyanın Komrat kasabasının “Dimitriy Karaçoban” adına teoretik lițeyi, yortulu bir sıraylan, kutladı 65-ci yıldönümünü.
Bu gözäl yıldönümünnän “Dimitriy Karaçoban” adına teoretik lițeyini kutlamaa deyni, o günü bu üüredicilik kuruluşuna geldilär Gagauziya İspolkomu Predsedatelin yardımcısı İlya UZUN, Gagauziya üüredicilik Upravleniyanın başı Natalya KRİSTEVA, Komrat primarı Sergey ANASTASOV hem kasaba Sovetin başı Georgiy VLAH, başka aar musaafirlär.
65 yılın içindä bu üüredicilik kuruluşunu başardı 20 binän zeedä insan. 2024-2025 üürenmäk yılın esaplarına görä, Gagauziya lițeylerin arasında II-ci eri aldı. Büünkü gündä bu lițeydä üürener 650 zeedä üürenci, angılarını üürederlär 50 yakın üüredici.
