Memlekettä kuvettä bulunan “Çalışmak hem Birlik” (PAS) partiyasının adamnarı açıkladılar, ani 2026-cı yılın sonunadan Moldovada başarılacek hem kabledilecek eni administrativ-teretorial düzeninin reforması.
Ani bu reformaylan memleketi komşu Romıniya administrativ-teretorial kaluplarına sokêrlar kuvetlär hiç saklamêêrlar da. Ani bu reformanın taa bir uuru var: Gagauziya Avtonom-Teretorial Bölgesini yok etmäk – bunu da onnar herbir köşedän baarêrlar.
Geçän afta bu administrativ-teretorial düzeninin reformasınnan ilgili bir bilgi ortaya sızdı. Moldovanın eski vițe-premyer-ministrusu Aleksandr MURAVSKİY internettä yayınnadı “Moldova Respublikasının rayonnarında demografiya dinamikası (2014-2024)” adlı bir meraklı karta, angısını hazırlamış MR Devlet kanțeläriyası hem vermiş onu administrativ-teretorial düzeninin reformasını incelemä toplantısına katılan parlamentın deputatlarına. Bu karta hazırlanmış 2014 hem 2024 yıllarında yapılan insan sayısınına görä hem verer prognoz 2033-cü yıla kadar.
Bu kartada pek meraklı hem faydalı țıfralar önümüzä çıkêr: on yılın içindä, Kişinevdän kaarä, herbir rayonda demografiya dinamikası sener – bütün respublikada 20% kadar. Aneniy Noy, Orhey, Straşen, Yaloven rayonnarında hem Gagauziyada bu senmäk 20% zeedä gösterili.
2033-cü yıl için dä demografiya dinamikası pek prost: burada artık Kişinevdä dä bunun senmesi gösterili.
Burada taa bir meraklı iş ortaya çıkêr: herliim bu kartada verilän Moldovada 2024-cü yılda insan sayısı – 2 409 207 kişi sä (bunnarın içindä uşaklar da), ozaman Moldova Seçim Komişiyasının verilän 3 297 960 seçimcilär sayısı neredän peydalandı?
