Gagauziyanın Kongaz küüyündän genç olan Dimitriy PAÇİ yaptı onu, neyi onadan kimsey yapmadı – gagauz milli akıl hem fikir “KURAN” oyununu dicital biçimindä dört dildä yarattı.
“KURAN” oyununu dicital biçimindä yaratmak için, Dimitriy PAÇİ ilktän bu oyunun özelliini inceledi hem kavradı, sora da, bir yılın içindä, bu oyunun dicital kalubunu yarattı. Gagauz “KURAN” oyunu, gagauz dilindän kaarä, yapılı rusça, romınca hem angliyca dillerdä dä.
Bu işlän Dimitriy PAÇİ hem gagauz adetlerini hem oyunnarını korumaa deyni bir adım yaptı, hem dä “KURAN” dicital oyununnan bütün dünneyä gagauzları annatmada hem annamada taa bir yol açtı.
Bölä, Dimitriy PAÇİ tarafından başarılan bu proekt, verer kolayını “KURAN” oyunumuz daymaların daymalarında kalsın, zerä, herkezi onu internet yardımınnan mobilnıy telefonuna indirip, herbir gagauz (hem diil salt gagauz) bulunduu erdä hem aylak vakıtta, raat hem havezlän oynasın, şahmata uurunda olan, akıl hem fikir “KURAN” oyunumuzu.
Eridir urgulamaa, ani, kendi üürencilerinin dicital uurunda programaların yapılmasında başarılı olduklarını göreräk, Kongaz Todur Zanet adına teoretik lițeyin angliycada üürediciykası Svetlana Dimitrievna DUŞKOVA attı ortalaa bir fikir, ki gagauz akıl oyunarın birisini dä dicital kalubunda yapmaa. Dimitriy PAÇİ bu fikirdän yan oldu.
Svetlana Dimitrievna hem Todur Zanet seçtilär angı oyun bu iş için uygun da, durgunup gagauz milli akıl hem fikir “KURAN” oyununda, iş başladı.
“KURAN” oyununu dicital biçimindä programasını yapmakta Dimitriy PAÇİya arka oldular Svetlana Dimitrievna DUŞKOVA hem onun dostu İvan GREKU, angısı programanın grafikasını yapmakta omuzunu koydu. Bundan kaarä, iş zamanında hepsinä üüredicilik hem danışmannık yaptı Akademik Todur ZANET.
Oyunu var nicä buradan indirmää: https://onelink.to/4cdwse
