2026-cı yılın Çiçek ayın 7-dä “Andrey Valkov” adına Komrat munițipiyi uşak muzıka şkolasında geçti “Sergey FİLİOGLU adına I-ci fortopiano hem kamera muzıkasında Respublika festivali”, angısı yapıldı Komrat Devlet Universitetın kultura hem incäzanaat kafedrasının teklifinä görä.
“Sergey FİLİOGLU adına I-ci fortopiano hem kamera muzıkasında Respublika festivali” adandı raametli anılmış muzıkacı, pianist, konțertmeyster hem pedagog Sergey Vasilyeviç FİLİOGLOnun (07.04.1976 – 05.11.2025) duuma günün 50-ci yıldönümünä hem onda pay aldılar universitetların, konservatoriyanın, muzıka şkolaların üüredicileri hem studentları.
Festivalin şannı musaafirleri oldular Kişinev A.Stırça adına İncäzanaat şkolasının direktoru, “Maestru în Artă” İ. V. BOGATAYA hem Respublikadakı S. Rahmaninov adına lițeyin pedagogu Dr. V. İ. STOYANOVA.
“Sergey FİLİOGLU adına I-ci fortopiano hem kamera muzıkasında Respublika festivali” sırasında oldu “Muzıka, teatru hem resimcilik incäzanaatları Akademiyası”nın fortopiano kafedrasının başının, Moldovanın halk artistın, “Maestru în Artă” Prof. Anatoliya LAPİKUSun master-klası, neredä Canabisi festifalä katılannarlan paylaştı kamera muzukasında kendisinin üstolan ustalıınnan.
