Çiçek ayın 23-dä Türkiye Respublikasında “23 Nisan Ulusal Egemenlik ve Çocuk Bayramı” (“Çiçek ayın 23-çü milli baamsızlık hem Uşaklar yortusu”) bakıldı.
Türkiyenin “23 Nisan Ulusal Egemenlik ve Çocuk Bayramı” (“Çiçek ayın 23-çü milli baamsızlık hem Uşaklar yortusu”) günü Türkiye Kişinev Büükelçilii uşaklara hem onnarın ana-bobalarına deyni kendi kapularını açtı hem musaafirleri için yortulu kutlama yaptı.
Kutlama başladı Türkiye Respublikasının kurucusu Mustafa Kemal ATATÜRKün byustuna çiçek koymaktan hem saygı duruşundan.
Sora, ev saabisi olarak, Türkiye Kişinev Büükelçisi Uygar Mustafa SERTEL musaafirlerin önündä bir kutlama nasaatı yaptı hem büükelçiliktä uşaklara bir ekskursiya geçirdi. Ekskursiya sırasında Büükelçi Uygar Mustafa SERTEL uşakları konsulluk bölümünün işinnän tanıştırdı hem dä kendisinin çalışmak odasını gösterdi.
Nedän sora uşaklar büükelçiliin bibliotekasına buyur edildilär hem burada hazırlanan programaya katıldılar hem baaşışlarını kablettilär.
Hep o günü Gagauziyanın başkasabasının Komrat Mustafa Kemal ATATÜRK bibliotekasında da bir yortulu sıraylan “Çiçek ayın 23-çü milli baamsızlık hem Uşaklar yortusu” kutlanıldı.
