Hederlez ayın (may) 28-dä Azerbaycan bakêr “Hederlez ayın 28 – Azerbaycan Respublika Günü” yortusunu.
“Hederlez ayın 28 – Azerbaycan Respublika Günü” yortusunnan ilgili olarak, Hederlez ayın (may) 22-dä Azerbaycan Respublikasının Moldovada Büükelçisi Ülvi BAKHŞALİEV (Baxşəliyev), eşinnän barabar, bir reçepțiya verdilär. Reçepțiyanın ofițial payında kutlama sözlerini tuttular Büükelçi Ülvi BAKHŞALİEV (Baxşəliyev) hem Moldova vițe-premyer-ministru, infrastruktura hem regional kalkınma ministrusu Vladimir BOLÄ.
Reçepțiyaya katıldılar Kişinevda bulunan diplomatiya misiyaların diplomatları, Moldova politikacıları, deputatları hem devlet adamnarı, Moldovada azerbaycannı diaspora kongresin temsilcileri, biznesmennar, Gagauziyadan musaafirlär hem cümne insannar.
Hep “Hederlez ayın 28 – Azerbaycan Respublika Günü” yortusuna baaşlandı Hederlez ayın (may) 27-dä Moldova istoriyası Milli muzeyindä yapılan romın dilinä çevirilmiş hem Azerbaycanın milli öndercisi Heydar ALİEVın duumasının 100-cü yıldönümünä hazırlanmış olan “Heydar ALİEV. 100 momente din viață” (avtor – akademik Emir Nasirli) kiyadın prezentațiyası.
Kiyadın prezentațiyasında pay aldılar hem nasaat ettilär Büükelçisi Ülvi BAKHŞALİEV, Moldova Respublikasının eski prezidentı Pötr LUÇİNSKİ, kiyadın avtoru Akademik Emir NASİRLİ, Moldovanın eski kultura ministrusu Monika BABUK, kiyadın sponsoru Vugar NOVRUZOV, Azerbaycanın büük dostu Aureliya GRİGORİU h.t.b.
