Moldovaya yapılan ofițial vizitında Türkiye Respublikasının AK Partiyasının Genel Başkan Yardımcısı hem Türk Devletlerinän İlişkilär Başkanı Kürşad ZORLU, Harman ayın 19-da, ayırı-ayırı olarak, Moldova Prezidentı Maya SANDUylan, Moldova Parlamentı spikerı İgor GROSUylan, Moldova premyer-ministusu Vasile TOFANnan hem Moldovanın dışişleri hem Evropaya integrațiya ministerliin devlet sekretari Carolina PEREBİNOSlan görüştü.
Nicä açıkladı Türkiyenin Anadolu habercilik Agenstvosu Türkiye Respublikasının AK Partiyasının Genel Başkan Yardımcısı hem Türk Devletlerinän İlişkilär Başkanı Kürşad ZORLU Moldovaya vizit için statyasında, bu vizit zamanı yapılan herbir görüşmedä iki devlet arasında politika, ekonomika, strategiyalı ortaklık hem Gagauziyaylan konular önä sürüldü.
Moldova Prezidentı Maya SANDUylan buluşmada Kürşad ZORLU urgulayarak, ani “iki devlet arasında ilişkilär gün-gündän ilerleer”, söledi ki “Tükiye Gagauziyada olan işlerin gelişmelerini hem onnarın ortalaaa yansımasını yakından gözleder”. Canabisinin açıklamasına görä, “Türkiye ileri dooru da Gagauziyanın ekonomika hem soțial kalkınmasına, kultura varlıın korunmasına hem Moldovaylan baalarını güçlendirmesinä ön vereräk, çalışmalarda bulunacek”.
Anadolu habercilik Agenstvosun açıklamasına görä Maya SANDU urgulamış, ani “Gagauziyanın konstituțiya hakları hem onun avtonomiya statusu hiç bir türlü ezilmeyeceklär”, hem “Türkiyeylän bu konuda en üüsek uurda işbirlinä hazır olduklarına urgu yapmış”.
Moldova Prezidentı Maya SANDUnun Kürşad ZORLUylan buluşması için prezidentura tarafından yapılan press-relizda “Gagauziyanın konstituțiya hakları hem onun avtonomiya statusu”n korunması için hiçbir laf ta yazılı yok. Orada sade açıklanêr, ani buluşmada “regionun ilerlemesi” lääzımnıı hem sölener “avtonomiyada dooru hem serbest seçimnär yapılması, ani kuvedä getireceklär o liderleri, angıları işleyeceklär gagauz cümnesinin faydasına – regionun ekonomika kalkınmasına hem gagauz dilinnän kulturasının korunmasına”.
Görüşmä zamanında Maya SANDU urgulamış, ani “Türkiye tarafından yapılan industriya kolecın Prezident Recep Tayyip ERDOĞANnan birliktä açmayı sabursuzluklan bekleer”.
Burada söz gider Komratta 2015-ci yılda TİKA tarafından başladılan hem Gagauziyada gagauz dilini genişlettirmäk hem uşaklarımıza üüredicilik uurunda üüsek izmetlär vermäk için kurulan “Türkiye Prezidentı Recep Tayyip ERDOĞAN üüredicilik kompleksı” için, ani taa sora Moldova tarafında industriya kolecına çevirildi hem angısının ana binası taa 2022-ci yılda başarıldı hem dä studentları kabletmää hazır, ama artık dört yıl boş durêr.
Moldova Parlamentı spikerı İgor GROSUylan buluşmada Kürşad ZORLU Türkiyenin dünnä politikasında adımnarını hem erini açıklamış, urgulayarak Türkiyenin barışı kurmakta aracılık rolünu. Burada Ukraynada olan işlär için söleyeräk, Canabisi urguladı, ani “Rusiyaylan olan ilişkilerimizin adımnarı, Ukraynada cengi durdurmaa çalışan hem Ukraynanın toprak bütünnüünü kabletmäk. Bu uurda, şüpesiz, Moldovanın toprak bütünnüü bizim için çok önemnidir” demiş.
İgor GROSUylan buluşmada “Gagauziyadakı gelişmelär hem işbirlii çalışmaları da” incelenmiş.
Bu uurda Moldova Parlamentın spikerı urgulamış, ani “Kişinev Gagauziya avtonomiyası regionun özel hak statusunu sayêr hem isteer, ki Moldova Respublikasının yaşamasına o bütünnä integrațiyalı olsun bir ilerleyän, dilini, kulturasını hem özelliini koruyan avtonomiya gibi”.
Anadolu habercilik Agenstvosu yazêr, ani Moldova premyer-ministusu Vasile TOFANnan buluşmada Kürşad ZORLU “Moldova vizitımızmızın ana gündelik punktu Gagauziya olduunu altını çizeräk, eni dönemdä Gagauziyada dil hem kultura çalışmaların yanında, ekonomika alanında da invistițiyaların yapılmasını belertti”.
Kendi tarafından Vasile TOFAN açıkladı, ani Moldovada Türkiyeylän işbirliinä büük maana veriler.
Moldovanın dışişleri hem Evropaya integrațiya ministerliin devlet sekretari Carolina PEREBİNOSlan görüşmedä Kürşad ZORLU “Türkiye-Moldova arasında büük progres olduunu diplomatiya ilişkilerin kurulmasınnan hem Strategiyalı Ortaklık Belgesinin imzalnmasınnan urguladı”.
Buluşmada Kürşad ZORLU genä urguladı, ani “Belli ki, bizim burada bulunduumuzun baş sebepi – Gagauziyaya vizitımız hem buradakı kardaşlarımızlan Moldova arasındakı ilişkileri güçlendimäk”. Gagauzların dilinin Türkiye Türkçesinä dünnädakı en yakın dil grupası olduunu nışannayarak, Canabisi dedi: “Bu annamda Gagauziyadakı barış, raatlık hem ilerlemäk yok nicä ayırı düşünülsün Moldovanın bütün baş raatlıından ayırı”.
Carolina PEREBİNOS ta kendi tarafından urguladı, ani “Gagauziya avtonomiyası Türkiye hem Moldova arasında bir köprü işini yapmaktadır”.
Hep o günü AK Partiyasının Genel Başkan Yardımcısı hem Türk Devletlerinän İlişkilär Başkanı Kürşad ZORLU Türkiye Kişinev Büükelçilinä hem TİKA Kişinev programaları ofisinä dä vizit yaptı.
Türkiye Kişinev Büükelçilindä Kürşad ZORLU Büükelçi Uygar Mustafa SERTELlän konsultațiyalarda bulundu.
TİKA Kişinev programaları ofisindä dä Moldova Koordinatoru Murat ZELANnan görüştü hem ömürä geçirilän proektlarlan ilgili bilgilär aldı.
Hepsi bu buluşmaklarda Kürşad ZORLUnun yanında vardılar Türkiye Respublikasının Büükelçisi Uygar Mustafa SERTEL, AK Partiyasının Türk Devletlerinän İlişkilär Başkan Yardımcısı, Elazığ Milletvekili Mahmut Rıdvan NAZIRLI hem AK Partiyasının Türk Devletlerinän İlişkilär Başkan Yardımcısı, MKYK Azası Naim MAKAS, bildirer Türkiyenin Anadolu habercilik Agenstvosu.
Harman ayın 20-dä AK Partiyasının Genel Başkan Yardımcısı hem Türk Devletlerinän İlişkilär Başkanı Kürşad ZORLU Gagauziyada vizitlan bulunêr.
