Gagauz Respublikasının Üüsek Sovetinin deputatı, Çadır kasaba Sovetin (1991-1995) başı, Gagauziyanın anılmış adamı Mihail GAGAUZ, Gagauziya Başkanın seçimnerinnän ilgili Moldova Parlamentının deputatlarına Nikolay DUDOGLUya hem İrina VLAHa, hem da Gagauziya insnnarına bir danışma yaptı.
DANIŞMA
Saygılı Moldova Parlamentın deputatı Nikolay DUDOGLU!
Saygılı Moldova Parlamentın deputatı İrina VLAH!
Gagauz Erindä yaşayan saygılı insannar!
2015-ci yılın Baba Marta ayın 22-dä Gagauz Erin başkan seçimneri olacak. Bizä, Gagauz Erindä yaşayan insannara deyni – bu pek cuvaplı seçimnär.
2014-cü yılın sonunda biz pay aldık taa bir cuvaplı seçimnerdä – Moldova Respublikasının Parlamentına. Bunun sonucu – Gagauziyadan parlamentta dört (4) kişi var. Gagauziya için bu büük başarılı iş, zerä Zakonnarı kabledärkän sadä bir oy var nicä Moldovanın hem Gagauziyanın ecelini kararlasın.
Başkan yok nicä doorudan Zakonnarın kabledilmesinä karışsın. Onun iş boorcu, onun kuvedi başka. Bu – Gagauz Erin statusunun kaavileşmesi, buna girer Ekonomika, Kultura, Üüredicilik, Mediţina, Halklararası ilişkilär.
Saygılı Moldova Parlamentın deputatı Nikolay DUDOGLU!
Saygılı Moldova Parlamentın deputatı İrina VLAH!
Sizin birinizin Gagauz Eri Başkanı seçilmesinnän, biz kaybedecez bir sesi, bir er parlamentta, bu da getirecek ona, ani Moldova Parlamentında Zakon kabledilmesindä bizim katkımız yufkalanacek.
Esaba alarak Sizin iş becerikliinizi, yalvarêrız Sizi, sorumnu hem becerikli işleyäsiniz MR Parlamentında, da, Zakonnarı kabledärkana bununnan koruyasınız Moldova Respublikasının hem Gagauz Eri avtonomiyanın intereslerini.
Gagauziya Halkının intereslerindä hem MRParlamentının deputat mandatının paalılıına görä, teklif ederiz Sizä çekäsiniz kendi kandidaturalarınızı Gagauz Erin başkannıından.
Gagauz Erindä yaşayan saygılı insannar!
Biz danışêrız Sizä pay tutasınız bu Danışmadan.
Gagauz Eri başkanı ayırmaa bir insanı, ani uyêr bizim isteyişlerimizä. Bu akıllılık, üürenmişlik, Patriotizma, ekonomikayı hem finansları bilän Çorbacı. Gagauz, devlet, rus, angliyskiy dilleri bilän. İntelligent. Kavgacı olmayan, Sözä açık, Kompromislara gidän, milletlärarası hem halklararası ilişkilerdän Annayan.
Açan Avtonomiya kayıp olma kertiinä geldi, pek önemni bireri birleştirmää MR Parlamentının deputatlarının, Halk Topluşun deputatlarının, GE Başkanının, kasaba hem küü Sovetniklerinhem Primarların kuvetlerini. Biz inanêrız, ani bizim ayırdıımız insannar birleşip, halkın islää gelecää için işleyeceklär.
Saygılarlan: Mihail GAGAUZ, Gagauz Respublikasının Üüsek Sovetin deputatı, Çadır kasaba Sovetin (1991-1995) başı
Not. Bu Danışma altında herbir isteyän kişi var nicä imzasını koysun.
