Çiçek ayın 28-dä Moldovanın Filarmoniyasında şaşılacek bir simfoniya konţertı oldu. Konţerttä pay aldılar Türkiyedän pionistka Rüya TANER hem Maêstro Georgi MUSTEA önderciliindä “Teleradio-Moldova” Milli simfoniya orkestrası. Konţertı ortak işbirliindä hazırladılar Türkiye Respublikasının Kişinev Büükelçillii, Teleradio-Moldova cümne kompaniyası hem “Sergey Lunkeviç” milli Filarmoniyası.
Konţertin önündä kısa sözlän Filarmoniyanın salonunda bulunannara danıştılar Türkiye Kişinev Büükelçisi Mehmet Selim KARTAL hem Moldova kultura ministrunun yardımcısı Georgi POSTİKA.
Mehmet Selim KARTAL nasaatında açıkladı, ani bu konţert olêr “Barış için” hem adanêr Türkiyenin Gelibolu cengin 100-cu yıldönümünä.
Konţert programasında vardılar Dimitriy KANTEMİRın “Preşevur” yaratmakları, G. ÇEBANUnun “Dou kantataları”, S. PISLARiyanın “Moldaviya knäzi”, G. MUSTEAnın “Türk oyunu” hem W.A.MOZARTın “Piyano hem orkestra için 21-ci Do-Major konţertı”.
Konţert – şaşılacek bir konţertti! İki saada yakın sţenadan büüleyici bir muzıka esti. Konţertä gelän diplomatlar, kultura adamnarı, sıradan insannar büük bir muzıka dünnäsında bulunardılar.
O avşam “Teleradio-Moldova” Milli simfoniya orkestrası annadılamayan bir büük ustalıklan bütün kompoziţiyaları çaldı. Açan da sıra geldi Türkiyedän pionistkaylan Rüya TANERlän simfoniyaya, gelärdi, ani Filarmoniyanın sţenasından en üüsek uurda melodiyalar hem havalar akardılar. Bölä talantlı konţert Kişinevda çoktan olmadı.
Konţerttän sora Maêstro Georgi MUSTEA konţert için hem büük pionistka Rüya TANER için bölä dedi: “Bölä üüsek uurda W.A.MOZARTın konţertını on yıldan zeedä bän yoktur işittiym. Saygılı Rüya TANERın fortopyanoda çalması büüleyici bir işti. Bana gelärdi, ani bu avşam en üüsek muzıka kendi kendinä akardı. W.A.MOZARTı bölä oynamaa – bu pek büük bir ustalık. Kutlêêrım kendisini hem şükür ederim Türkiye Kişinev Büükelçisinä Mehmet Selim KARTALa hem onun pek saygılı eşinä Banu Cankan KARTAL hanum-efendiyä, ani verdilär kolayını bana bir sţenada bulunmaa bölä büük bir profesional pionistkaylan nicä Rüya TANER. Hem saa olsunnar, ani baaşladılar Moldovanın siiredicilerinä bu büülü muzıka avşamını”.
Not. Rüya TANER, Türkiyenin en islää pianistkalarından birisi olarak tanınêr. Başardı Ankara Devlet Konservatoriyasını hem sora da üürendi Londonun Guildhall School of Music and Drama şkolasında. Çok festivallärdä hem milli konkurslarda lauret oldu. Evropanın, Amerikanın hem Aziyanın 55 devletindän zeedesindä en anılmış orkestralarlan konţert verdi. Onun konţertleri milli radiolarda hem televideniyalarda çok kerä cannı yayınnandı.
Rüya TANER Barış için Birleşmiş Artistlerin Asoţiaţiyasının azası.
Anaktar sözlär : Rüya TANER
