Hederlez ayın (may) 6-da Çadır kasabasında Gagauziya kutladı gagauzların en büük milli yortularından birisini – Hederlezi! Kutlamada pay aldılar diil salt Gagauziyadan, ama aşırıdan insannar da. Hederlez kutlamaları hazırlandı hem yapıldı Çadır kasabasının “AT-Prolin” at fermasının ipodromunda hem onun dolaylarında.
Hederlez adetimizi görmää hem yortuda pay almaa deyni burayı üzlärcä insan geldi. Onnarın arasında, Gagauziya öndercilerindäm kaarä, vardılar Moldova kultura ministrusu Monika BABUK, Moldova Parlamentın hem Gagauziya Halk Topluşun deputatları, aşırı devletlerin Büükelçileri, diplomatiya misiyaların temsilcileri, Moldova soţialistlär partiyasının başı İgor DODON, Moldovanın Bizim partiyamız partiyasının başı Renato USATIY hem başka devlet, cümne hem kultura insannarı.
Maasuz Hederlez yortusu için ipodromda hem onun dolaylarında Gagauziyanın herbir rayonundan gözäl donaklı milli aullar kuruldu. Kimi aullarda milli imeklerdän hem içkilerdän kaarä el ustalık malların sergileri da vardı.
Ayırı erlerdä kendi mallarını sergiledilär hem satardılar erli hem aşırıdan gelän kimi halk ustaları da: kilimcilär, susakçılar, kürkçülär, resimcilär, terzilär, muzıka instrumentlerini yapannar, yularcılar hem başkaları.
Yortu başladı ondan, ani Gagauziya Başkanı İrina VLAH Gagauziya Halk Topluşu Başı Dimitriy KONSTANTİNOVlan barabar, hem paalı musaafirlerinnän birliktä, milli aulları dolaştılar. Burada Canabilerini, adetä görä, tuz-ekmeklän, birär filcan şaraplan, halk oyunnarunnan hem sıralarınnan karşladılar.
Açan hepsi milli aulları dolaştılar, ev saabileri hem musaafirlär ipodromun baş tribunasına erleştilär da başladı kutlamada pay alan ansamblilerin hem kolektivların paradı. Bu paradta 300 yakın insan pay aldı.
“Yaşa Halkım” (laflar – Todur ZANET, muzıka – İlya FİLEV) türkünün durmamayca sesi altında, bayraklar hem LATİNİŢAylan yazılı transporantlar ellerindä, Gagauziyadan, Türkiyedän, Ukraynadan, Tatarstandan (Rusiya Federaţiyası), Moldovadan hem Romıniyadan ansamblilär hem kolektivlar örüdülär. Birkaç vakıda tribunanın önündä durgunup, herbir ansambli kısa bir nomer gösterdi. Ansamdlilär örüyüşünü açtı gagauzların anılmış ansambili “Düz Ava”, sora biri-biri ardı geçtilär ansamblilär: “Sornay” (Kazan kasabası, Tatarstan), «Журавушка» (Feropontyevka küüyü), «Вдохновение» (Komrat kasabası), “Sedef”(Beşalma küüyü), “İ’STAR” (Komrat kasabası), “Sevda” (Kazayak küüyü), Kongaz Suleyman Demirel Türk-Moldova liţeyi, “Altın çöşmä” (Kongaz küüyü), “Şen uşaklar” (Çadır kasabası), “Çalı kuşu” (Kotlovina küüyü, Ukrayna), «Хоровой коллектив» (Komrat kasabası), «Гагаузские коробейники» (Komrat kasabası), «Диксиленд» (Komrat kasabası), «Поляки Буджака» (Komrat kasabası), “Kadınca” (Çadır kasabası), “Lale” (Başküüyü), “Evelki Düz Ava” (Komrat), “Çöşmä” (Komrat kasabası), “Altıncık” (Beşgöz küüyü), “Yıldızlar” (Valkaneş kasabası) hem başkaları.
Ansamblilär örüyüşü sonuna vardıktan sora, Hederlez yortunun oţial payı çeketti. Başladı o Moldovanın hem Gagauziyanın gimnalarından.
Taa eveldän Hederlez yortusunda gagauzlar at yarışmaları yaparmışlar. Onuştan, gimnalardan sora, ilkin laf verildi Çadır “AT-Prolin” at fermasının direktoruna Konstantin KELEŞä, angısı tanıştırdı musaafirleri o atlarlan, ani Hederlez yortusunun baş sırasında – “Altın At” yarışmalarında – pay alaceklar. O atların tribunaların önündän edektän geçirdilär hem ipodromda denemä koşuları gösterildi.
Pek meraklı bir iş oldu o günü. “AT-Prolin” at fermasının direktoru Konstantin KELEŞ tanıştırı siiredicileri üç günnük bir kuliylän (Bella hem Rubinın kulisininnän) da teklif etti ona ad koymaa. Tekliflär çoktu, ama sonunda karar alındı Enseyiş Günü için kulinin adını Brest koymaa.
Bundan sora, kutlama sözünnän ipodromda bulunanara hem Gagauziyanın bütün insannarına danıştı Gagauziya Başkanı İrina VLAH.
At yarışmaların önündä başladı kamçı patlatması yarışması. Onda ensedilär çadırlılar Dimitriy KELEŞ hem Panteley FEDORENKO.
Sora “Altın At” yarışmaları başladı.
İki yıllık atlarda erleri aldılar: 1-ci – Mihail ZLATOV (Komrat kasabası, kısırak – “Pifogor”); 2-ci – Sergey ZAMŞELKİN (Esirli küüyü, Basarbka rayonu, kısırak – “Podarok”), 3-cü – Daniel SIRBU (Floreştı kasabası, kısırak – “Vama”).
Üç yıllık atlarda erleri aldılar: 1-ci – Mihail ZLATOV (Komrat kasabası, haygır – “Vodopad”); 2-ci – Grigoriy DRAGAN (Kirsovo (Başküüyü) küüyü, haygır – “Liveny”), 3-cü – Nikolay POPOV (Taraklı kasabası, haygır – “Dobrıy”).
“Altın At” yarışmaları en üüsek noktasına yaklaştıydı, açan işä Allaa karıştı – başladı yaamur hem tolu. Bu üzerä “Altın At” yarışması durgundu, ama Konstantin KELEŞ açıkladı, ani bu yarışmalar Kirez ayın (iyün) 9-da ilerleyeceklär.
Avşamneyin Çadırın meydanında Hederlez yortusu bir büük konţertlän kapandı.
Not. Hederlez yortusu kutlayannara kendi yazılı selämını yolladı Moldova Parlamentın deputatı Nikolay DUDOGLU.
Dimu ERİBAKAN
Redakţiyamızdan: Saa olsunnar hepsi kim bu gözäl Hederlez yortusunu insannara baaşladı: başta Gagauziya Başkanı İrina VLAH olarak İspolkom azaları, Gagauziya Halk Topluşu Başı Dimitriy KONSTANTİNOV hem GHT deputatları, rayon administraţiya başları hem kasabalarlan küülerin primarları, Gagauziya kultura hem turizma Upravleniyanın başı Vasilisa PETROVİÇ hem upravleniya azalrı, ansamblilerin muzıkantları hem artistleri, Çadır “AT-Prolin” at fermasının direktoru Konstantin KELEŞ hem fermanın izmetçileri. Saa olsunnar hepsi insannar, kim saymadı zaametini hem vakıdını da bu yortunun olması için katkıda bulundu hem omuzunu koydu. Saa olsun GagauzMediya.md portalı, ani bölä gözäl patretleri çıkarmış da kolaylıı oldu onnarı kullanalım.
PATRETLÄR – GagauzMediya.md
