Türkiye Prezidentı Recep Tayyip ERDOĞAN açıkladı, ani başlayıp Orak ayın 21-dän beeri Türkiyedä 3 aylık üstolan durumu kurulêr. Canabisi urguladı, ani bu kararı aldı Türkiye Konstituţiyasının 120-ci statyasına görä, Milli Güvennik Kurulu hem Bakannar Kurulu toplantılarından sora.
Üstolan durumun kurulması ilgili Türkiyedä Orak ayın 15-dä olan devlet devrimi denemesinnän hem terorun önünü kesmää deyni.
Türkiye Prezidentı Recep Tayyip ERDOĞAN açıkladı, ani “Orak ayın 15-dä olan devlet devrimi denemesindä Türkiyedä 246 insan öldürüldü hem 1536 kişi yaralandı. O insannarın arasında var asker, poliţiya hem sıradan vatandaşlar”, bildirer AA agenstvosu.
Not. Büünkü gündä Türkiyedä, devlet devrimi denemesinnän ilgili olarak, yaklaşık 8 bin kişi tutuklandı. Şkolalardan hem universitetlardan 21738 pedagog, dekan, rektor iştän uzaklaştırıldı. Binnän kişi: poliţiya, asker, sudya, advokat, üüredici göz altına alındı.
Foto – http://aa.com.tr/
