Harman ayın (avgust) 5-dä Valkaneşin “Valkaneş stanţiyası” maalesindä açıldı uşaklara deyni oynamak meydanı, angısının adı “15 Temmuz Şehitlerini Anmak Parkı” koyuldu. Bu parkı Türkiye Respublikası TİKA yolunnan türk halkından gagauz kalkına baaşladı.
“15 Temmuz Şehitlrini Anmak parkı”n ofiţial açılışında pay aldılar Türkiye Kişinev Büükelçisi Mehmet Selim KARTAL, Kişinev TİKA kordinatorluk Ofisin kordinatoru Canan ALPASLAN, Gagauziya Başkanı İrina VLAH, Valkaneş rayonun başı Födor TERZİ hem, belliki, Valkaneş kasabanın primarı Viktor PETRİOGLU.
Kendi açılış sözündä Türkiye Kişinev Büükelçisi Mehmet Selim KARTAL, gözleri yaşlan dolu, urguladı, ani “15 Temmuz (Orak ayı – nışan “AS”) günü Türkiyedä olan asker devlet devrimi denemesinnän üzlän insan, kendi vatanını korumaa deyni şehit (geroyca öldü – nışan “AS”) oldu. Onun için bu “15 Temmuz Şehitlrini Anmak Parkı”n açılması bizim için pek önemni”.
Kişinev TİKA kordinatorluk Ofisin kordinatoru Canan ALPASLAN urguladı, ani “ilktän bu parkın adını “Gagauz-türk dostluu Parkı” koymaa neet vardı. Ama Türkiyedä 15 Temmuz (Orak ayı – nışan “AS”) günü olan kannı olaylardan sora karar aldık parkın adını “15 Temmuz Şehitlrini Anmak Parkı” koymaa.
Kendi adlarından Gagauziya Başkanı İrina VLAH, Valkaneş rayonun başı Födor TERZİ hem, belliki, Valkaneş kasabanın primarı Viktor PETRİOGLU şükür ettilär Türkiye Kişinev Büükelçisinä hem Kişinev TİKA kordinatorluk Ofisin kordinatoruna o çalışmalar için, ani Gagauziyaya deyni yapêrlar hem da şükür ettilär Türkiyeyä, ani gagauzlara herzaman omuz koyêrlar.
Primar Viktor PETRİOGLU, Valkaneş primariyasının adından, Kişinev TİKA kordinatorluk Ofisin kordinatoruna hem işi yapan firmanın temsilcisinä Diplomnar verdi.
Parkın açılışından sora, paalı musaafirlerä deyni, Valkaneş kultura Evin uşak ansamblisi kısa bir konţert gösterdi.
Anaktar sözlär : 15 Temmuz Şehitlerini Anmak Parkı
