Komratta geçti gözal bir festival “Gagauz Şarap yortusu”, angısına bizi da, kurçuluları, çaardılar da biz büük havezlän yortuya katıldık. Bizä görä bu yıl Festival geçti taa geniş, taa şen, taa meraklı…
Pek sevindik ona ani bu gün Komrat kasabanın uz hem düzgün meydanında pek çok musaafir vardı hem bütün gün insan hiç siirelmedi. Hava da yortuya gibi gözäldi: güneşli, lüzgersiz, kimär kera kär yaamurcuk ta serpidärdi, ama diil çok vakıda. Göklär dä istemäzdilär bozmaa bu gözäl yortu kefini.
Sevineriz, ani Odesa bölgesinin Gagauz kultura merkezi olarak bizä da kısmet düştü pay almaa yortuda. Biz götürdük Ukraynadan gagauzların dokuma, kırma hem başka tülü palalarını, dikmä dorojkaları hem tablaları, dokuma gözäl peşkirleri. Soframız da doluydu, nicä yaraşeer musaafirci gagauzlara.
Sofranın gözelliydi – kolaç, tuz-ekmek hem çotra şaraplan. Bozmadı soframızı kıırmaa da, kaurma da, piinir da, turşu da, sarma da, dolma da biber da, suan-sarmısak da, ceviz da, taa başka meyvalar hem zarzavatlar da. Taa dooru sölemaa – güzün zengin bereketleri. “Gagauz Şarap yortusu” oldu nica bir baaşış insannara: bereket toplandı, şaraplar yapıldı, güz işleri başa çıktılar…
Gözäl yortuya “Saa ol” deeriz. Eni karşılaşmakları bekleeriz.
Olga KULAKSIZ, Odesa bölgesinin Kurçu küüyün Gagauz kultura Merkezin başı
