Kasımın 6-da, Gagauziyanın başkasabasında “Gagauz şarabın yortusu” geçti.
“Gagauz şarabın yortusu” başladı ondan, ani musaafirlerä hem hepsinä kim geldi bu yortuya, Gagauz milli teatrusunun artistleri, “Düz Ava” hem “Evelki Düz Ava” ansamblilerin artistleri gösterdilär nicä gagauzlarda şarabı yapêrlar. Sora da hepsi musaafirlär “Horu” oynadılar.
“Gagauz şarabın yortusu”nun ofiţial açılışı için sţenaya, Gagauziya öndercilerinnän bilä, çıktılar yortunun şannı musaafirleri: Türkiye Başbakan Yardımcısı Turgul TÜRKEŞ, Türkiye Kişinev Büükelçisi Hulusi KILIÇ, Kişinev TİKA Koordinatoru Canan ALPASLAN, Rusiyanın Sankt-Peterburg kasabasının viţe-gubernatoru Sergey MOVÇAN, Moldova Parlamentının viţe-spikerı Vladimir VİTÜK, Moldovanın çiftçilik çorbacılıın ministrusu Eduard GRAMA, başka musaafirlär.
Yortunun ofiţial açılışından sora hepsi musaafirlär, Gaguziya Başkanı İrina VLAHın önderciliindä, dolaştılar aulları, ani kuruluydu o günü Komradın meydanında. Çorbacılar musaafirlerini tuz-ekmeklän karşladılar, şaraplan hem milli imeklärlän konakladılar hem ikram ettilär. Lääzım urgulamaa, ani aulların sayısı kırka yakındı. Onnarın arasında vardılar aullar diil salt Gagauziyadan, ama komşu moldovan hem bulgar küülerindän da. Vardı burada Gagauziya Başkanın aulu da.
Yortuda 13 nominaţiyada en islää şarap hem şarapçılar hem da en islää kaurma seçildi. “Gagauz şarabın yortusu”nun Büük Ödülünü kabletti “Tomay-Vinex” şarap fabrikası.
Üülendän sora, insannara deyni kilimciliktä, çiten örmesindä, tafta oymasında hem başka zanaatlarda ustalık örnekleri gösterildi.
Yortuda bütün gün konţert gösterildi. Konţerttä, Gagauziya artistlerindän kaarä, pay aldılar aşırıdan artistlär da.
Patretlär – anasozu.com, haber.md, gagauzinfo.md
