Ankaradan kara haber geldi: büün 58 yaşında olan Avrasya Yazarlar Birlii Genel Başkanı Dr. Yakup ÖMEROĞLU, aar bir hastalıın beterinä, raametli oldu.
Avrasya Yazarlar Birlii Genel Başkanı Dr. Yakup ÖMEROĞLU, bir kultura elçisi olarak, bütün ömürünü koydu Türkiye hem Türk dünnääsı arasında kultura, literatura hem dostluk ilişkilerini kaavileştirmää hem bu uurda büük, başarılı hem önemni rolü yaptı.
Dr. Yakup ÖMEROĞLU, Türkiyenin Çankırı kasabasında 1966-ci yılda duudu. Yazıcı, gazetaci, bilimnär doktoru, kultura adamı. Çok literatura hem aaraştırma kiyatların avtoru. Ondan zeedä sayısız literatura hem jurnalistika ödüllerin saabisi. Onun yaratmakları Türkiyedä, Azerbaycanda, Kazahstanda, Kirgizistanda, Gagauziyada hem başka erlerdä tiparlandılar. Canabisinin çalışmalarınnan Türk Dünäsı Literatura Dergileri (Jurnalları) Kongreslerı yapıldı hem 2014-cü yılda Türk Dili Konuşan Ülkelär Yazarlar Birlii kuruldu.
Dostumuzun, Avrasya Yazarlar Birlii Genel Başkanı Dr. Yakup ÖMEROĞLUnun Türkiye hem Türk dünnääsının kulturasına, literaturasına hem dostluuna verilän can sıcaklık izmetleri hiç bir zaman unudulmayacek.
Topracıı ilin olsun! Allaa onu saa yanına kabletsin!
Todur ZANET
