Ceviz ayın (sentäbari) 18-dä Kişinevun “Ştefan çel Mare” adına cümne parkında oldu “Çeşitliktän birleşmäk” adlı XV-ci Etnofestival. Bu XV-ci Etnofestival bıldır lääzımdı olsun, ama ozaman onu atladıp 2016-cı yıla aldılar.
“Gagauz aulu”nu bu yıl donakladı Beşalma muzeyi, direktoru Lüdmila MARİN (Karaçoban) öndercilii altında, hem Beşalmadan “Sedef” ansamblisi. Musaafirleri karşladı kendi oyunnarınnan “Düz Ava” ansamblinin orkestrası hem onun gençlik oyun kolu.
Aulun başında Gagauziya İspolkomun predsedatelin birinci yardımcısı Vadim ÇEBAN bulunardı. Ona yardımcı oldu Gagauziya kultura hem turizma Upravleniyanın başı Vasilisa PETROVİÇ. Geldilär burayı gagauz kompozitoru Dimitry GAGAUZ, bilim adamnarı Nikolay PAMUCAK hem Dimitriy GARGALIK, akademik hem yazıcı Todur ZANET ta.
“Gagauz aulu”na ofiţial musaafirlerini, angıların arasında vardılar Moldova ministruları, deputatları hem Evropa Birliin Moldovada büükelçisi Pirkka TAPİOLLA getirdi Modova gagauzların cümne kuruluşun başı Nikolay TERZİ. Belli ki üüsek musaafirleri tuz-ekmeklän hem şaraplan karşladılar.
Etnofestival vakıdında “Ştefan çel Mare” adına cümne parkında bulunduunuz zaman esap alêrsınız, ani, bezbelli, insannar bu festivaldän suulmaa başladılar. Festivalin açılışında vardılar sadä burayı getirilän ansamblilerin azaları, etno kuruluşların öndercileri hem kimi cümne hem politika insannarı. Açılışta pay aldılar Moldovanın birkaç ministrusu, Moldova Parlamentın iki-üç deputatı hem, belli ki, Moldovanın etnikaarası ilişkilär Departamentın öndercileri.
Parkın içi da pek tehnaydı. Festival için parkta siirek kurulan azınnıkların aullarını taa çok politikacılar hem Moldova Prezidentliinä kandidatlar gezärdilär. Sıradan insannar pek görünmäzdilär.
Üülendä parkta kurulan sţenadan folklor ansamblileri konţert gösterdilär.
Not. “Çeşitliktän birleşmäk” adlı XV-ci Etnofestivalä katılmadılar ne Moldovanın prezidentı, ne Parlamentın spikerı, ne da premyer-ministrusu.
