Büün, Baba marta ayın 2-dä (bu gün her yılı gezeer), Hristian klisä kalendarinä görä “Prost olma pazarı” bakılêr, çünkü bu gün Büük oruca (Paskellä orucuna) girmää deyni hazırlanmakta Piinir aftasının son günü.
“Prost olma pazarı”nda, artık adetä görä, hepsi uşaklar savaşêrlar toplanmaa ana-boba evinä da, bir yıl içindä yapılan yannışlıklarını tanıyarak, yakınnarınnan prost olêrlar.
Prost olmak bölä geçer: herkezi “Prost et beni!” deyeräk, karşı tarafın elini öper, o kişi da deer: “Bän prost ederim – Allaa da prost etsin! (Allaa prost edecek!)”. Sora giderlär komuşulara hem saadıçlara da prost olmaa.
“Prost olma pazarı” çoktan artık klisä kanonnarından dışarı çıktı da genä döndü gagauz “ateştän atlamaa” adetinä.
Ateltän atlarkana, büüklär kendileri atlêêrlar, küçük uşakları sa kucaklan ateş üstündän geçirerlär. Evellär bu yapılarmış pirelerdän, kehlelerdän hem başka bitlerdän kurtulmak için. Şindi sa şennenmäk için yapılêr. Ateşi atlarkan baarêrlar: “Silkinsin pirelär, silkinsin kehlelär – kalsın ateşä!”
Prost olma pazarı avşamsı uşaklar yımırta hamnêêrlar: süüş yımırtayı, kapçıını soyup, iplän baalêêrlar yukarı, ölä, ani uşaklar dizçä çöktüünän yımırta olsun onnarın aazlarının uurunda. Sora yımırtayı sallêêrlar da uşaklar elsiz lääzım onu dalasınnar.
